సూర్య, చింతలమానేపల్లి : మండలంలోని పలు గ్రామాలకు వెళ్లే ప్రధాన రహదారులు గుంతలమయంగా మారి ప్రజలకు తీవ్ర ఇబ్బందులు కలిగిస్తున్నాయి. రహదారులపై అడుగడుగునా ఏర్పడిన గుంతలు వాహనదారులకు ప్రమాదకరంగా మారగా, నిత్యం రాకపోకలు సాగించే గ్రామీణ ప్రజలు అవస్థలు పడుతున్నారు. రహదారుల దుస్థితి తెలిసినా సంబంధిత అధికారులు మరమ్మతులపై దృష్టి సారించడం లేదని స్థానికులు ఆవేదన వ్యక్తం చేస్తున్నారు. ఆడెపల్లి, కొత్తగూడ, కర్జెల్లి, కేతీని, గూడెం, రాన్వెల్లి, కోయపల్లి తదితర గ్రామాలకు వెళ్లే రహదారుల పరిస్థితి అధ్వానంగా మారడంతో ప్రయాణం ప్రజలకు భారంగా మారింది.
— అడుగుకో గుంత.. ప్రయాణమంతా ప్రమాదమే!
ప్రధాన రహదారులపై పెద్దపెద్ద గుంతలు ఏర్పడటంతో వాహనదారులు తీవ్ర ఇబ్బందులు ఎదుర్కొంటున్నారు. గుంతలను తప్పించే క్రమంలో ద్విచక్ర వాహనదారులు అదుపుతప్పే ప్రమాదం ఉంది. రాత్రి వేళల్లో గుంతలు కనిపించకపోవడంతో ప్రమాదాల ముప్పు మరింత పెరుగుతోంది. నిత్యం ఈ మార్గాల్లో ప్రయాణించే వారు ప్రాణాలను అరచేతిలో పెట్టుకుని వెళ్లాల్సిన పరిస్థితి నెలకొందని గ్రామస్థులు వాపోతున్నారు.
— ఇకనైనా స్పందిస్తారా?
గ్రామీణ ప్రజల రాకపోకలకు కీలకమైన ప్రధాన రహదారులకు వెంటనే మరమ్మతులు చేపట్టాలని స్థానికులు విజ్ఞప్తి చేస్తున్నారు. ప్రమాదాలు జరగకముందే గుంతలను పూడ్చడంతో పాటు నాణ్యతతో కూడిన శాశ్వత రహదారి నిర్మాణ పనులు చేపట్టాలని కోరుతున్నారు. అధికారులు, ప్రజాప్రతినిధులు స్పందించి తమ కష్టాలకు పరిష్కారం చూపాలని గ్రామీణ ప్రజలు ఆశిస్తున్నారు.
