108 అంబులెన్స్‌లో సుఖ ప్రసవం..
గార, సూర్య : పురిటినొప్పులతో బాధపడుతున్న గర్భిణికి 108 అంబులెన్స్‌లోనే సిబ్బంది సురక్షితంగా ప్రసవం చేశారు. గార మండలం కళింగపట్నం పల్లిపేట గ్రామానికి చెందిన ఎన్‌. భాను బెహరా పురిటినొప్పులతో ఇబ్బంది పడుతుండటంతో కుటుంబ సభ్యులు 108 అత్యవసర సేవలకు సమాచారం అందించారు. దీంతో వెంటనే గ్రామానికి చేరుకున్న 108 సిబ్బంది ఆమెను మెరుగైన వైద్యం కోసం శ్రీకాకుళం రిమ్స్‌ ఆసుపత్రికి తరలించేందుకు బయలుదేరారు.
అయితే మార్గమధ్యంలో గర్భిణికి నొప్పులు తీవ్రం కావడంతో పరిస్థితిని గుర్తించిన ఈఎంటీ హరీష్‌, పైలట్‌ నారాయణరావు అంబులెన్స్‌ను రహదారి పక్కన నిలిపి, స్థానిక ఆశా కార్యకర్త లక్ష్మి సహకారంతో వాహనంలోనే ప్రసవం నిర్వహించారు. ఈ క్రమంలో భాను బెహరా పండంటి మగబిడ్డకు జన్మనిచ్చారు.
అనంతరం తల్లీబిడ్డలకు ప్రాథమిక వైద్య సంరక్షణ అందించి, క్షేమంగా రిమ్స్‌ ఆసుపత్రికి తరలించారు. అక్కడ వైద్యులకు అప్పగించారు. తల్లీబిడ్డలిద్దరూ క్షేమంగా ఉండటంతో కుటుంబ సభ్యులు ఆనందం వ్యక్తం చేశారు. అత్యవసర సమయంలో సమయస్ఫూర్తితో వ్యవహరించి సురక్షిత ప్రసవానికి సహకరించిన 108 సిబ్బంది హరీష్‌, నారాయణరావు, ఆశా కార్యకర్త లక్ష్మిని కుటుంబ సభ్యులు, గ్రామస్తులు అభినందించారు.
రిపోర్టర్ : గోపాల్ కృష్ణ, నరసన్నపేట, శ్రీకాకుళం జిల్లా.
