తెలంగాణ సంస్కృతికి ప్రతీక బతుకమ్మ

వికాస్ జూనియర్ కళాశాల ప్రిన్సిపాల్ శ్రీనివాస్

వికారాబాద్ జిల్లా ప్రతినిధి,మేజర్ న్యూస్: తెలంగాణ సంస్కృతి, సంప్రదాయాలకు బతుకమ్మ పండుగ ప్రతీకగా నిలుస్తుందని వికాస్ జూనియర్ కళాశాల ప్రిన్సిపాల్ శ్రీనివాస్ అన్నారు. మహాలయ అమావాస్య రోజున ఎంగిలిపూల బతుకమ్మతో ప్రారంభమై తొమ్మిది రోజులపాటు వైభవంగా నిర్వహించి, సద్దుల బతుకమ్మతో ముగిసే ఈ ఉత్సవాలు తెలంగాణ ఆత్మగౌరవానికి ప్రతీకలని పేర్కొన్నారు.ఈ సందర్భంగా శనివారం వికాస్ జూనియర్ కళాశాల ఆవరణలో విద్యార్థినులు, మహిళా అధ్యాపకులు బతుకమ్మ సంబరాలను ఘనంగా నిర్వహించారు. రంగురంగుల పూలతో బతుకమ్మలను పేర్చి, సంప్రదాయ పాటలు పాడుతూ ఉత్సాహంగా వేడుకల్లో పాల్గొన్నారు.ఈ సందర్భంగా ప్రిన్సిపాల్ శ్రీనివాస్ మాట్లాడుతూ.. తెలంగాణ ఉద్యమంలో బతుకమ్మ పాటలు, సంబరాలు కీలక పాత్ర పోషించాయని తెలిపారు. నేడు తెలంగాణ సంస్కృతికి ప్రతీకగా నిలిచిన బతుకమ్మ ఉత్సవాలు ప్రపంచవ్యాప్తంగా నిర్వహించబడటం గర్వకారణమన్నారు. సాధారణంగా పూలతో భగవంతుడిని పూజిస్తామని, బతుకమ్మ పండుగలో పూలనే దైవ స్వరూపంగా భావించి ఆరాధిస్తామని వివరించారు. ప్రకృతి ప్రసాదించిన పూలు పర్యావరణ పరిరక్షణలోనూ, నీటి శుద్ధిలోనూ ప్రాధాన్యత కలిగి ఉన్నాయని పేర్కొన్నారు.కళాశాల స్థాపించిన నాటి నుంచి గత 26 సంవత్సరాలుగా బతుకమ్మ ఉత్సవాలను నిర్వహిస్తున్నామని తెలిపారు. విద్యార్థులకు విద్యాబోధనతో పాటు మన సంస్కృతి, సంప్రదాయాలపై అవగాహన కల్పించడం ఎంతో అవసరమన్నారు. ఇలాంటి కార్యక్రమాల ద్వారా భావితరాలకు తెలంగాణ సంస్కృతి, సంప్రదాయాలను అందించవచ్చని పేర్కొన్నారు.ఈ కార్యక్రమంలో విద్యార్థినులు బతుకమ్మ పాటలు పాడుతూ, నృత్యాలు చేస్తూ సందడి చేశారు. ఈ వేడుకల్లో మహిళా అధ్యాపకులు ఉమారాణి, వరలక్ష్మి, వనితతో పాటు అధ్యాపకులు ప్రభాకర్ రెడ్డి, రామచంద్రయ్య, నర్సింహులు, కిష్టయ్య తదితరులు పాల్గొన్నారు.