తుఫాను నేపథ్యంలో ప్రజలు అప్రమత్తంగా ఉండాలి

మచిలీపట్నం, మేజర్ న్యూస్: బంగాళాఖాతంలో ఏర్పడిన అర్నబ్ తుఫాను నేపథ్యంలో మచిలీపట్నం పార్లమెంట్ నియోజకవర్గ ప్రజలు అప్రమత్తంగా ఉండాలని ఎంపీ వల్లభనేని బాలశౌరి సూచించారు. తుఫాను ప్రభావంతో భారీ వర్షాలు, బలమైన ఈదురుగాలులు వీచే అవకాశం ఉన్నందున అత్యవసరమైతే తప్ప బయటకు రావద్దని, అధికారులు జారీ చేసే హెచ్చరికలను పాటించాలని కోరారు. తీర ప్రాంత, లోతట్టు ప్రాంతాల ప్రజలు ప్రత్యేక జాగ్రత్తలు తీసుకోవాలని, మత్స్యకారులు సముద్రంలోకి చేపల వేటకు వెళ్లవద్దని సూచించారు. విద్యుత్ స్తంభాలు, తెగిపడిన విద్యుత్ తీగలు, పాత భవనాలు, చెట్లకు దూరంగా ఉండాలని, అవసరమైతే సురక్షిత ప్రాంతాలకు తరలివెళ్లాలని తెలిపారు. తుఫాను సమయంలో ప్రజలకు అండగా నిలవాలని జనసేన నాయకులు, కార్యకర్తలకు పిలుపునిచ్చారు. స్థానిక అధికారులతో సమన్వయం చేసుకుంటూ అవసరమైన వారికి ఆహారం, తాగునీరు, మందులు అందించే సహాయక చర్యల్లో పాల్గొనాలని సూచించారు. లోతట్టు ప్రాంతాల్లో చిక్కుకున్నవారు, వృద్ధులు, దివ్యాంగులు, చిన్నారులకు సహాయం అందించేందుకు ప్రాధాన్యత ఇవ్వాలన్నారు. అయితే, అధికారుల సూచనల మేరకే సహాయక చర్యలు చేపట్టాలని స్పష్టం చేశారు. తుఫాను కారణంగా ప్రాణ, ఆస్తి నష్టం జరగకుండా సంబంధిత శాఖల అధికారులు సమన్వయంతో ముందస్తు చర్యలు తీసుకోవాలని, తీర గ్రామాలు, ముంపు ప్రాంతాల్లో సహాయక శిబిరాలు, ఆహారం, తాగునీరు, వైద్య సదుపాయాలు సిద్ధంగా ఉంచాలని కోరారు. విద్యుత్, రహదారులు, తాగునీటి సరఫరాకు అంతరాయం కలగకుండా చర్యలు చేపట్టాలని ఎంపీ బాలశౌరి సూచించారు.

స్టాఫ్ రిపోర్టర్: ✍️ ప్రేమ్ రాజ్, మచిలీపట్నం, కృష్ణాజిల్లా.