సూర్య, మందమర్రి : చదువుతోపాటు క్రీడల్లోనూ రాణిస్తూ మందమర్రి తెలంగాణ మోడల్ స్కూల్ విద్యార్థిని జీ. అనూ తన ప్రతిభను చాటుకుంది. జోనల్ స్థాయి ఫుట్‌బాల్ పోటీల్లో ప్రతిభ కనబరిచి రాష్ట్రస్థాయి పోటీలకు ఎంపికై పలువురి ప్రశంసలు అందుకుంది. పాఠశాలలో పదో తరగతి చదువుతున్న అనూ.. అక్టోబర్ 26న నిర్వహించిన జోనల్ స్థాయి ఫుట్‌బాల్ పోటీల్లో ప్రతిభ కనబరిచి రాష్ట్రస్థాయి పోటీల్లో పాల్గొనేందుకు అర్హత సాధించింది. మెదక్‌లో జరగనున్న రాష్ట్రస్థాయి పోటీల్లో ఆమె తన ఆటతీరును ప్రదర్శించనుంది. విద్యార్థుల్లో దాగి ఉన్న క్రీడా నైపుణ్యాలను వెలికితీసేందుకు పాఠశాల స్థాయిలో ప్రోత్సాహం ఎంతో అవసరమని ఈ సందర్భంగా పాఠశాల ప్రిన్సిపాల్ సారా తస్నీమ్ అభిప్రాయపడ్డారు. రాష్ట్రస్థాయి పోటీల్లోనూ ఉత్తమ ప్రతిభ కనబరిచి విజయం సాధించాలని ఆకాంక్షించారు. అనూ సాధించిన విజయంపై పాఠశాల ప్రిన్సిపాల్ సారా తస్నీమ్, పీటీ ఉపాధ్యాయురాలు ఎం. చిన్నక్క హర్షం వ్యక్తం చేస్తూ ఆమెను అభినందించారు.
