రైతులకు భరోసా.. సహకార సంఘాల వద్దే వడ్లు అమ్మాలి!

కొండాపూర్‌ ; కొండాపూర్‌ మండల పరిధిలోని కొండాపూర్‌, గొల్లపల్లి, తేర్పోల్‌ సహకార సంఘాల ఆధ్వర్యంలో ఏర్పాటు చేసిన వడ్ల కొనుగోలు కేంద్రాలను ఆత్మ కమిటీ చైర్మన్‌ వై. ప్రభు, సీడీసీ చైర్మన్‌ రాంరెడ్డి ప్రారంభించారు. ఈ సందర్భంగా ప్రభు మాట్లాడుతూ ప్రభుత్వం రైతులకు అండగా నిలుస్తూ ధాన్యం కొనుగోళ్ల ద్వారా భరోసా కల్పిస్తోందన్నారు.రైతులు దళారులను నమ్మి మోసపోకుండా ప్రభుత్వం నిర్ణయించిన సహకార సంఘాల కొనుగోలు కేంద్రాల్లోనే ధాన్యాన్ని విక్రయించాలని సూచించారు. సన్న వడ్లకు క్వింటాల్‌కు రూ.500 బోనస్‌ అందిస్తున్నందున రైతులు ఈ అవకాశాన్ని సద్వినియోగం చేసుకోవాలని కోరారు. కొనుగోలు కేంద్రాల్లో ధాన్యం విక్రయించడం ద్వారా ప్రభుత్వ మద్దతు ధరతో పాటు వర్తించే బోనస్‌ ప్రయోజనాలను పొందవచ్చని తెలిపారు.

రైతులకు అవసరమైన సౌకర్యాలు

ధాన్యం ఆరబెట్టుకునేందుకు రైతులకు టార్పాలిన్లు అందజేస్తున్నామని ప్రభు తెలిపారు. రైతులకు ఎలాంటి ఇబ్బందులు కలగకుండా కొనుగోలు ప్రక్రియను నిర్వహించేందుకు చర్యలు తీసుకుంటామని పేర్కొన్నారు. ధాన్యం తూకంలో ఎలాంటి అవకతవకలు జరగకుండా, కొనుగోళ్లు సజావుగా జరిగేలా సంబంధిత అధికారులు ఎప్పటికప్పుడు పర్యవేక్షించాలని సూచించారు. రైతులు తమ ధాన్యాన్ని కొనుగోలు కేంద్రాలకు తీసుకువచ్చి ప్రభుత్వ కొనుగోలు విధానాన్ని సద్వినియోగం చేసుకోవాలని కోరారు.ఈ కార్యక్రమాల్లో కొండాపూర్‌ సొసైటీ సీఈఓ సిరాజ్‌, సొసైటీ చైర్మన్‌ మాణిక్‌రెడ్డి, తలారి రాజు, నరసింహారెడ్డి, విష్ణువర్ధన్‌రెడ్డి, మండల కాంగ్రెస్‌ పార్టీ అధ్యక్షుడు మల్లారెడ్డి, కాంగ్రెస్‌ పార్టీ నాయకులు, రైతులు తదితరులు పాల్గొన్నారు.