కరువు కష్టాలను పక్కదారి పట్టించేందుకే కాంగ్రెస్‌ డైవర్షన్‌ రాజకీయాలు : బిఆర్ఎస్ నేత ఎర్రోళ్ల శ్రీనివాస్
సూర్య బ్యూరో ప్రతినిధి : రాష్ట్రంలో కరువు పరిస్థితులు, ఎండిపోతున్న పంటలు, నిరుద్యోగుల సమస్యలు, ఎన్నికల హామీల అమలులో వైఫల్యాల నుంచి ప్రజల దృష్టి మళ్లించేందుకే కాంగ్రెస్‌ ప్రభుత్వం ప్రతిపక్షాలపై విమర్శలకు దిగుతోందని కార్పొరేషన్‌ మాజీ చైర్మన్‌ డాక్టర్‌ ఎర్రోళ్ల శ్రీనివాస్ ఆరోపించారు. ప్రజా సమస్యలపై సమాధానం చెప్పలేక కాంగ్రెస్‌ నేతలు వ్యక్తిగత విమర్శలకు దిగుతున్నారని ఆయన విమర్శించారు.కాంగ్రెస్‌ అధికారంలోకి వస్తే తొలి ఏడాదిలోనే రెండు లక్షల ఉద్యోగాలు ఇస్తామని హామీ ఇచ్చి నిరుద్యోగులను మోసం చేసిందని అన్నారు. అశోక్‌నగర్‌లో నిరుద్యోగుల చుట్టూ, రైతుల వద్దకు తిరిగి హామీలిచ్చిన బల్మూరి వెంకట్‌, చామల కిరణ్‌, అద్దంకి దయాకర్‌ తదితర నేతలు పదవులు చేపట్టాక ప్రజా సమస్యలను పట్టించుకోవడం లేదని విమర్శించారు. ఎస్‌ఎస్‌సీ, ఏఈఈ పరీక్షలు ఒకే రోజు నిర్వహించడంపై ప్రభుత్వం సమాధానం చెప్పాలని డిమాండ్‌ చేశారు. రాష్ట్రంలో 12 లక్షల ఎకరాల్లో పంటలు ఎండిపోయాయని, రైతులకు నష్టపరిహారం అందించడంలో ప్రభుత్వం విఫలమైందని ఆరోపించారు. గోదావరి, కృష్ణా నదుల్లో నీరున్నా సాగునీటి ప్రాజెక్టుల ద్వారా పంటలకు నీరందించడంలో ప్రభుత్వం నిర్లక్ష్యం వహిస్తోందని విమర్శించారు. రైతుల విద్యుత్‌ సమస్యలను పరిష్కరించడంతో పాటు ఎండిన పంటలకు పరిహారం చెల్లించాలని డిమాండ్‌ చేశారు.
ఎన్నికల ముందు ఇచ్చిన ఆరు గ్యారెంటీల హామీలను అమలు చేయకుండా ప్రజలపై విద్యుత్‌ చార్జీల భారం మోపారని ఆరోపించారు. దళిత, గిరిజనుల సంక్షేమ పథకాలు, నిరుద్యోగులకు ఇచ్చిన హామీల అమలుపైనా ప్రభుత్వం స్పష్టత ఇవ్వాలని కోరారు.
ప్రజా సమస్యలపై దృష్టి సారించి, ఇచ్చిన హామీలను అమలు చేయాలని కాంగ్రెస్‌ ప్రభుత్వాన్ని డాక్టర్‌ ఎర్రోళ్ల శ్రీనివాస్ డిమాండ్‌ చేశారు.
