గండిగూడెం సమస్యల పరిష్కారానికి కూటమి నాయకుల హామీ

టి.నరసాపురం, మేజర్ న్యూస్:గండిగూడెం గ్రామంలో నెలకొన్న ప్రధాన సమస్యలను పరిష్కరించేందుకు కూటమి నాయకులు హామీ ఇచ్చారు. బుధవారం రామాలయంలో పూజల అనంతరం ఎన్నికల ప్రచారం ప్రారంభించిన నాయకులు, కమ్యూనిటీ హాల్‌లో గ్రామస్తులు, ‘మేము సైతం మిత్ర బృందం’ సభ్యులతో సమావేశమయ్యారు.ఈ సందర్భంగా గ్రామంలోని ప్రధాన బీటీ రోడ్డు నిర్మాణం, డ్రైనేజీ వ్యవస్థ, ఉడతల మెట్ట రోడ్డు అభివృద్ధి, విద్యుత్ సమస్యలు, పక్కా ఇళ్ల మంజూరు, అసంపూర్తిగా ఉన్న అంగన్వాడీ భవనం తదితర సమస్యలను నాయకుల దృష్టికి తీసుకెళ్లారు. కూటమి అభ్యర్థులు గెలిచిన వెంటనే రోడ్డు నిర్మాణ పనులు ప్రారంభిస్తామని, ఇందుకు తానే బాధ్యత వహిస్తానని శీలం వెంకటేశ్వరరావు హామీ ఇచ్చారు. ఇతర సమస్యల పరిష్కారానికి కూడా కృషి చేస్తామని తెలిపారు.ఈ కార్యక్రమంలో సామాజిక కార్యకర్త ఎస్.డి. నాజర్ పాషా, జెడ్పీటీసీ, ఎంపీటీసీ అభ్యర్థులు, గ్రామ పెద్ద కొరివి శేషారావు, కూటమి నాయకులు జొన్నబోయిన సోంబాబు, చింతలపూడి నవీన్, పింగుల మధు, చాట్రాతి యుగంధర్ తదితరులు పాల్గొన్నారు.