స్థానిక సంస్థల ఎన్నికల్లో టీడీపీకి వైసీపీ నేతల సవాల్

నెల్లూరు సిటీ, మేజర్ న్యూస్ :   స్థానిక సంస్థల ఎన్నికల నేపథ్యంలో నెల్లూరు జిల్లాలో రాజకీయ వాతావరణం వేడెక్కుతోంది. అధికార తెలుగుదేశం పార్టీకి దీటుగా వైఎస్సార్ కాంగ్రెస్ పార్టీ నేతలు కాకాని గోవర్ధన్ రెడ్డి, పర్వతరెడ్డి ఎన్నికల పోరులో తమదైన శైలిలో ముందుకు సాగుతున్నారు. పార్టీ అభ్యర్థుల తరఫున ఎన్నికల ప్రక్రియలో చురుకుగా వ్యవహరిస్తూ రాజకీయంగా పోటీని ఆసక్తికరంగా మారుస్తున్నారు.

నెల్లూరు నగరంలో ఏకగ్రీవాలపై ఆసక్తి

నెల్లూరు నగర కార్పొరేషన్ పరిధిలో ఇప్పటివరకు ఒక్క డివిజన్‌ను కూడా ఏకగ్రీవం కాకుండా వైసీపీ నేత పర్వతరెడ్డి పోరాటం కొనసాగిస్తున్నారనే రాజకీయ వర్గాల చర్చ ప్రాధాన్యం సంతరించుకుంది. ఎన్నికల ప్రక్రియలో అభ్యర్థుల నామినేషన్లు, పోటీ కొనసాగింపుపై వైసీపీ నేతలు దృష్టి సారించారు.  మరోవైపు, జిల్లా స్థాయిలో కాకాని గోవర్ధన్ రెడ్డి పార్టీ శ్రేణులను సమన్వయం చేస్తూ ఎన్నికల వ్యూహాలపై దృష్టి పెట్టినట్లు పార్టీ వర్గాలు పేర్కొంటున్నాయి. స్థానిక సంస్థల ఎన్నికల్లో ప్రధాన పార్టీల మధ్య పోటీ నేపథ్యంలో రానున్న పరిణామాలు, ఎన్నికల ఫలితాలు ఎలా ఉండబోతున్నాయన్నది రాజకీయ వర్గాల్లో ఆసక్తికరంగా మారింది.