రామకృష్ణ పై పీ డి యాక్ట్ నమోదు
చిత్తూరు ప్రతినిధి మేజర్ న్యూస్. ఐరాల మండలం చెంగనపల్లి గ్రామానికి చెందిన ఎస్. రామకృష్ణ అలియాస్ సనంగి రామకృష్ణ అలియాస్ రాకేష్ (27), తండ్రి లేట్ ఎస్. నాధముని అనే వ్యక్తిపై శాంతి భద్రతలకు విఘాతం కలిగిస్తూ వరుస నేర కార్యకలాపాలకు పాల్పడుతున్న నేపథ్యంలో పీడీ యాక్ట్ కింద నిర్బంధ చర్యలు చేపట్టడం జరిగింది. ప్రభుత్వ అధికారులు విధులు నిర్వహిస్తున్న సమయంలో వారిపై దాడులు, దౌర్జన్యాలు, బెదిరింపులకు పాల్పడటంతో పాటు మహిళల పట్ల అసభ్యకర ప్రవర్తన, భూ ఆక్రమణలు, క్రిమినల్ బెదిరింపులు తదితర నేర కార్యకలాపాలకు పాల్పడుతూ ప్రజలను భయభ్రాంతులకు గురిచేస్తున్నట్లు పోలీసుల నివేదికలో పేర్కొనబడింది. ఇతనిపై ఐరాల ఇతర పోలీస్ స్టేషన్లలో పలు క్రిమినల్ కేసులు నమోదై ఉన్నాయి.ప్రజా శాంతి భద్రతకు విఘాతం కలిగించడం వంటి కారణాలతో, సాధారణ చట్టపరమైన చర్యలు సరిపోనందున జిల్లా కలెక్టర్ జిల్లా మేజిస్ట్రేట్ సుమిత్ కుమార్ , చిత్తూరు ఎస్పీ తుషార్ డూడి సిఫారసు మేరకు పీ డీ యాక్ట్ కింద నిర్బంధ ఆదేశాలు జారీ చేసి, నిందితుడు ఎస్. రామకృష్ణ అలియాస్ రాకేష్ ను కడప సెంట్రల్ జైలుకు శనివారం తరలించారు.ప్రజా శాంతి భద్రతలకు విఘాతం కలిగించే నేర కార్యకలాపాలకు పాల్పడే వ్యక్తుల పట్ల ప్రజలు అప్రమత్తంగా ఉండాలని, ఎవరైనా అసాంఘిక కార్యకలాపాలకు పాల్పడుతున్నట్లు సమాచారం ఉంటే వెంటనే సమీప పోలీస్ స్టేషన్కు లేదా పోలీసులకు తెలియజేయాలని చిత్తూరు జిల్లా ఎస్పీ తుషార్ డూడి కోరారు.
ఉమాశంకర్ చిత్తూరు స్టాఫ్ రిపోర్టర్.