ఎన్నికల ప్రవర్తన నియమావళిని పకడ్బందీగా అమలు చేయాలి
సూర్య ప్రతినిధి, ఒంగోలు : ఎన్నికల నేపథ్యంలో చెక్‌పోస్టుల వద్ద తనిఖీలను మరింత ముమ్మరం చేసి, ఎన్నికల ప్రవర్తన నియమావళిని పకడ్బందీగా అమలు చేయాలని జాయింట్ కలెక్టర్ కల్పనా కుమారి అధికారులను ఆదేశించారు. బుధవారం ఆమె ఎన్‌జీ పాడు, అద్దంకి తదితర ప్రాంతాల్లోని చెక్‌పోస్టులను ఆకస్మికంగా తనిఖీ చేశారు. ఎన్‌జీ పాడు గ్రామంలో ఎన్నికల ప్రవర్తన నియమావళి అమలు తీరును పరిశీలించి, ఎఫ్‌ఎస్‌టీ, ఎంసీసీ బృందాలకు పలు సూచనలు చేశారు.
అనంతరం ఎన్‌జీ పాడు మండల పరిషత్ కార్యాలయంలో ఎఫ్‌ఎస్‌టీ, స్టాటిక్ సర్వైలెన్స్ టీమ్స్, ఎంసీసీ బృందాలతో జాయింట్ కలెక్టర్ సమీక్ష సమావేశం నిర్వహించారు. చెక్‌పోస్టుల వద్ద ప్రతి వాహనాన్ని క్షుణ్ణంగా తనిఖీ చేయాలని సూచించారు. తనిఖీల సందర్భంగా కేసులు నమోదైతే సంబంధిత నివేదికలను పరిశీలకులకు అందజేయాలని ఆదేశించారు.
ఎన్నికల ప్రవర్తన నియమావళి నిబంధనలు తూచా తప్పకుండా అమలయ్యేలా అధికారులు, సిబ్బంది సమన్వయంతో పనిచేయాలని జాయింట్ కలెక్టర్ సూచించారు. వాహనాల తనిఖీల్లో అప్రమత్తంగా వ్యవహరించాలని, అనుమానాస్పద వస్తువులు, నగదు లేదా ఇతర సామగ్రిని సరైన అనుమతులు లేకుండా తరలిస్తున్నట్లు గుర్తిస్తే వెంటనే సంబంధిత అధికారులకు సమాచారం అందించడంతో పాటు నిబంధనల మేరకు కేసులు నమోదు చేయాలని స్పష్టం చేశారు.
