కరువు నివారణ చర్యలపై అధికారుల దృష్టి

భీమదేవరపల్లి, మేజర్ న్యూస్, భీమదేవరపల్లి మండలాన్ని కరువు ప్రభావిత మండలంగా గుర్తించిన నేపథ్యంలో కరువు నివారణ చర్యలపై అధికారులు దృష్టి సారించారు. బుధవారం మండల ప్రజా పరిషత్ కార్యాలయంలో అధికారులు, సర్పంచులు, పంచాయతీ కార్యదర్శులు రాష్ట్ర, జిల్లా స్థాయి అధికారులతో వీడియో కాన్ఫరెన్స్‌లో పాల్గొన్నారు. ఈ సందర్భంగా పంచాయతీరాజ్ శాఖ మంత్రి సీతక్క కరువు నివారణకు చేపట్టాల్సిన చర్యలపై పలు సూచనలు చేశారు. వి.బి.జి. రాంజీ పథకం ద్వారా ఉపాధి పనులు చేపట్టాలని, నీటి సంరక్షణకు ఇంకుడు గుంతలు, ఫామ్‌ పాండ్ల నిర్మాణాన్ని ప్రోత్సహించాలని సూచించారు. విద్యుత్ పొదుపు చర్యలు పాటిస్తూ కరువు పరిస్థితులను సమర్థంగా ఎదుర్కొనేందుకు అన్ని శాఖల అధికారులు సమన్వయంతో పనిచేయాలని పేర్కొన్నారు. ఈ కార్యక్రమంలో ఎంపీడీవో వీరేశం, సర్పంచుల ఫోరం మండల అధ్యక్షుడు లక్ష్మారెడ్డి, వివిధ శాఖల మండల అధికారులు పాల్గొన్నారు.

రిపోర్టర్; రామకృష్ణ, భీమదేవరపల్లి హనుమకొండ జిల్లా