ఎంపీటీసీ, జెడ్పీటీసీ ఎన్నికలు–2026 సిబ్బందికి రెండవ విడత శిక్షణ

గుడ్లవల్లేరు మేజర్ న్యూస్ : మండలంలో రెండవ సాధారణ మండల పరిషత్ ప్రాదేశిక నియోజకవర్గాలు, జిల్లా పరిషత్ ప్రాదేశిక నియోజకవర్గాల ఎన్నికలు–2026 నిర్వహణలో భాగంగా ఈ రోజు ఎన్నికల విధులకు నియమించబడిన సిబ్బందికి రెండవ విడత శిక్షణా కార్యక్రమాన్ని నిర్వహించినట్లు ఎన్నికల రిటర్నింగ్ అధికారి  బి. స్వర్ణలత తెలిపారు. ఈ సందర్భంగా ఉదయం నుండి మధ్యాహ్నం వరకు ఓట్ల లెక్కింపు పర్యవేక్షకులకు శిక్షణా కార్యక్రమం నిర్వహించారు. ఓట్ల లెక్కింపు విధానం, అనుసరించాల్సిన నియమ నిబంధనలు, లెక్కింపు సమయంలో తీసుకోవాల్సిన జాగ్రత్తలు, విధుల నిర్వహణలో పాటించాల్సిన ఎన్నికల సంఘం మార్గదర్శకాలపై శిక్షణ ఇచ్చారు. అనంతరం మధ్యాహ్నం నుండి సాయంత్రం 6.00 గంటల వరకు గుడ్లవల్లేరు మండలంలో ఎన్నికల విధులకు నియమించబడిన ప్రిసైడింగ్ అధికారులు, సహాయ ప్రిసైడింగ్ అధికారులకు రెండవ విడత శిక్షణ నిర్వహించారు. ఈ శిక్షణలో పోలింగ్ విధుల నిర్వహణ, బ్యాలెట్ పత్రాల వినియోగం, పోలింగ్ ప్రక్రియ, ఎన్నికల సామగ్రి నిర్వహణ, పోలింగ్ అనంతరం పూర్తి చేయాల్సిన విధులు, ఎన్నికల నియమ నిబంధనలపై అధికారులు సిబ్బందికి అవగాహన కల్పించారు. ఎన్నికల విధులకు నియమించబడిన ప్రతి ఒక్కరూ శిక్షణలో వివరించిన అంశాలను క్షుణ్ణంగా అవగాహన చేసుకొని, ఎన్నికల సంఘం మార్గదర్శకాలకు అనుగుణంగా ఎలాంటి పొరపాట్లకు తావులేకుండా తమ విధులను బాధ్యతాయుతంగా నిర్వహించాలని ఎన్నికల రిటర్నింగ్ అధికారి స్వర్ణలత సూచించారు.

స్టాఫ్ రిపోర్టర్: ✍️ ప్రేమ్ రాజ్, గుడివాడ నియోజకవర్గం, కృష్ణాజిల్లా.