వంశధార వరద బాధితులకు అండగా ఉంటాం.. ఎవరూ అధైర్యపడవద్దు!

- మోకాల్లోతు వరద నీటిలో పర్యటించిన ఎమ్మెల్యే గొండు శంకర్  
- కండ్రపేట, తాంసాహెబ్ పేట గ్రామాల్లో విస్తృత పర్యటన

గార అక్టోబర్ 30 మేజర్ న్యూస్:
వంశధార నది ఉగ్రరూపం దాల్చి, సాధారణ స్థాయిని మించి ప్రవహిస్తుండటంతో శ్రీకాకుళం నియోజకవర్గం పరిధిలోని గార మండలోని ముంపు బారిన పడిన తాంసాహెబ్ పేట, కండ్రపేట గ్రామాల్లో ఈరోజు శాసనసభ్యులు గొండు శంకర్ గారు క్షేత్రస్థాయిలో విస్తృతంగా పర్యటించారు. వరద పరిస్థితులను స్వయంగా సమీక్షించిన ఆయన, మోకాల్లోతు వరద నీటిలోనే కాలినడకన వెళ్లి గ్రామస్తుల కష్టాలను అడిగి తెలుసుకున్నారు. జలదిగ్బంధంలో చిక్కుకుని ఇళ్లకే పరిమితమైన నిస్సహాయ కుటుంబాల వద్దకు వెళ్లి వారికి స్వయంగా ఆహార పొట్లాలు పంపిణీ చేశారు. ఈ విపత్కర సమయంలో ఎవరూ ఆందోళన చెందవద్దని, బాధితులకు ప్రభుత్వం పూర్తి అండగా ఉంటుందని భరోసా కల్పించారు.
ప్రభుత్వ యంత్రాంగం ఇప్పటికే పూర్తిస్థాయిలో రంగంలోకి దిగిందని, ఎలాంటి ప్రాణ, ఆస్తి నష్టం జరగకుండా అన్ని రక్షణ చర్యలు ముమ్మరం చేశామని ఎమ్మెల్యే స్పష్టం చేశారు. బాధితులకు నిత్యావసరాలతో పాటు అవసరమైన అన్ని రకాల సహాయ సహకారాలు అందించడంలో అధికారులు అలసత్వం వహించకూడదని ఆదేశించారు. ముంపు ప్రాంతాల్లోని ప్రతి ఒక్కరికీ పరిశుభ్రమైన తాగునీరు, నాణ్యమైన భోజనం అందించడంతో పాటు చిన్నపిల్లలకు పాల ప్యాకెట్లు ఎటువంటి అంతరాయం లేకుండా నిరంతరం పంపిణీ చేయాలని సూచించారు.
వరద ప్రభావం తీవ్రంగా ఉన్నందున నదీ పరివాహక ప్రాంతాల ప్రజలు అత్యంత అప్రమత్తంగా ఉండాలని ఎమ్మెల్యే గొండు శంకర్ విజ్ఞప్తి చేశారు. వరద నీరు నిలిచి ఉన్నందున అంటువ్యాధులు, సీజనల్ వ్యాధులు ప్రబలే ప్రమాదం ఉందని, తక్షణమే గ్రామాల్లో ప్రత్యేక వైద్య శిబిరాలు ఏర్పాటు చేయాలని వైద్యాధికారులకు దిశానిర్దేశం చేశారు. సరిపడా మందులు, ఓఆర్‌ఎస్ ప్యాకెట్లు, నీటిని శుద్ధి చేసే క్లోరినేషన్ మాత్రలను ప్రజలకు అందుబాటులో ఉంచాలని స్పష్టం చేశారు. రెవెన్యూ, పంచాయతీరాజ్, ఇరిగేషన్, పోలీసు యంత్రాంగాలు సమన్వయంతో పనిచేస్తూ, వరద తగ్గుముఖం పట్టే వరకు నిరంతరం అప్రమత్తంగా ఉండి సహాయక చర్యల్లో చురుగ్గా పాల్గొనాలని ఆదేశించారు.
ఎమ్మెల్యే వెంట ఈ క్షేత్రస్థాయి పర్యటనలో స్థానిక ప్రజాప్రతినిధులు, నాయకులు, తహసీల్దార్, ఇరిగేషన్ శాఖ అధికారులు, గ్రామ నాయకులు, సచివాలయ సిబ్బంది తదితరులు పాల్గొన్నారు.