వృధాగా పోతున్న పాకాల చెరువు నీళ్లు
ఖానాపూర్, మేదర్ న్యూస్, ఖానాపూర్ మండలానికి ఆరాధ్య దైవమైన పాకాల చెరువు నీళ్లు వృధాగా వాగులో నుండి క్రిందికి వెళ్లిపోతుండటంపై ఖానాపురం సర్పంచ్ దాసరి రమేష్ తీవ్ర ఆవేదన వ్యక్తం చేశారు. తైబందీ ఖరారు అయిన తుంగబంధం కాలువలో చుక్క నీరు రాక వరి సాగు చేసుకున్న రైతుల పొలాలకు నీళ్లు లేక రైతులు అవస్థలు పడుతుంటే ఎలాంటి సాగులేని పాకాల వాగు మాత్రం ద్వారకపేట రేవు వద్ద మనుషులు దాటలేనంత ఉధృతంగా ప్రవహిస్తూ వృధాగా పోతోందని, ఈ వృధా నీటిని సంబంధిత శాఖ అధికారులు, చొరవ తీసుకొని అరికట్టాలని సర్పంచ్ దాసరి రమేష్ డిమాండ్ చేశారు. ఈ సంవత్సరం ఎల్ నినో ప్రభావం తీవ్రంగా ఉంటుందని వాతావరణ శాఖ హెచ్చరిస్తున్న నేపథ్యంలో ఇప్పుడున్న నిల్వ నీటిని ఈ విధంగా వృధా చేస్తే రాబోయే రోజుల్లో మనుషులకు తాగునీటికే తీవ్ర ఇబ్బందులు ఎదురవుతాయని, భూగర్భ జలాలు అడుగంటి బోర్లు ఎండిపోయి తాగునీటి ఎద్దడి తప్పదని, కాబట్టి ప్రతి చుక్క నీటిని కాపాడుకోవాల్సిన బాధ్యత అధికారులపై ఉందని, వెంటనే కలెక్టర్, నీటిపారుదల శాఖ ఉన్నతాధికారులు జోక్యం చేసుకొని వాగులోకి పోతున్న నీటిని ఆపి తుంగబంధం కాలువ ద్వారా రైతుల పొలాలకు మళ్లించాలని లేదా చెరువులోనే నిల్వ ఉంచి భవిష్యత్తు తాగునీటి అవసరాలకు వినియోగించాలని సర్పంచ్ దాసరి రమేష్ కోరారు.
రిపోర్టర్ :అనిల్ కుమార్ ,ఖానాపూర్ వరంగల్ జిల్లా
