షెహబాజ్ షరీఫ్‌ను ఆడుకున్న నెటిజన్లు: హాంకాంగ్ సిక్సెస్ ట్వీట్‌పై ట్రోలింగ్
సూర్య ఇంటర్నేషనల్ డెస్క్:హాంకాంగ్ సిక్సెస్ క్రికెట్ టోర్నమెంట్‌లో భారత జట్టుపై పాకిస్థాన్ విజయం సాధించడాన్ని ఆ దేశ ప్రధాని షెహబాజ్ షరీఫ్ సోషల్ మీడియా వేదికగా కొనియాడారు. అయితే ఈ పోస్ట్‌పై నెటిజన్లు తీవ్రస్థాయిలో స్పందిస్తూ ఆయనను ట్రోల్ చేయడం మొదలుపెట్టారు. దేశంలో తీవ్ర ఆర్థిక సంక్షోభం, ద్రవ్యోల్బణం, రాజకీయ అనిశ్చితి నెలకొన్న తరుణంలో రిటైర్డ్ ఆటగాళ్లు ఆడే ఒక సాధారణ ఎగ్జిబిషన్ టోర్నీ విజయాన్ని దేశ ప్రధాని ఇంతగా సంబరపడటం ఏమిటని నెటిజన్లు ఎద్దేవా చేస్తున్నారు.
హాంకాంగ్ వేదికగా జరిగిన ఈ ఆరు ఓవర్ల పోటీలో భారత జట్టుపై పాకిస్థాన్ విజయం సాధించగానే షెహబాజ్ షరీఫ్ తన అధికారిక ఎక్స్ (ట్విట్టర్) ఖాతాలో పాక్ జట్టుకు అభినందనలు తెలుపుతూ పోస్ట్ పెట్టారు. అయితే అంతర్జాతీయ ఐసీసీ టోర్నీల్లో భారత్ చేతిలో పాకిస్థాన్ వరుస పరాజయాలు ఎదుర్కొంటున్న విషయాన్ని భారతీయ క్రికెట్ అభిమానులు గుర్తుచేస్తూ కౌంటర్లు ఇచ్చారు. ప్రపంచకప్ లాంటి ప్రధాన వేదికలపై గెలవలేక ఇలాంటి లీగ్‌లలో గెలిస్తేనే సంబరాలు చేసుకుంటున్నారా అంటూ నెటిజన్లు కామెంట్ల వర్షం కురిపించారు.
మరోవైపు సొంత దేశానికి చెందిన పౌరులు సైతం ప్రధాని తీరుపై అసహనం వ్యక్తం చేశారు. దేశంలో నిత్యావసరాల ధరలు ఆకాశాన్నంటుతుంటే, ఐఎంఎఫ్ రుణాల కోసం ఎదురుచూసే పరిస్థితులు ఉంటే, ప్రధాన మంత్రి ఇలాంటి చిన్న క్రికెట్ మ్యాచ్‌లపై దృష్టి సారించడం విడ్డూరంగా ఉందని మండిపడ్డారు. ప్రస్తుతం ఈ పరిణామం సోషల్ మీడియాలో మీమ్స్, వ్యంగ్యాస్త్రాలకు దారితీసి పెద్ద ఎత్తున వైరల్ అవుతోంది.
