సీఏక్యూఎమ్ ‘పవన్’ ఇంటిగ్రేటెడ్ కంట్రోల్ సెంటర్ పరిశీలన: వాయు నాణ్యత చర్యలపై కేంద్రం ఫోకస్
సీఏక్యూఎమ్ ‘పవన్’ కమాండ్ అండ్ కంట్రోల్ సెంటర్‌ను సందర్శించిన కేంద్ర మంత్రి భూపేందర్ యాదవ్!
సూర్య నేషనల్ బ్యూరో, న్యూఢిల్లీ: దేశ రాజధాని ఢిల్లీ సహా జాతీయ రాజధాని ప్రాంతం పరిధిలో వాయు కాలుష్య నియంత్రణకు చేపడుతున్న చర్యలను పర్యవేక్షించేందుకు సరికొత్త డిజిటల్ వ్యవస్థ అందుబాటులోకి వచ్చింది. వాయు నాణ్యత నిర్వహణ కమిషన్ ఆధ్వర్యంలో ఏర్పాటు చేసిన అత్యాధునిక ఇంటిగ్రేటెడ్ కమాండ్ అండ్ కంట్రోల్ సెంటర్ 'పవన్' ను కేంద్ర పర్యావరణ, అటవీ, వాతావరణ మార్పుల శాఖ మంత్రి భూపేందర్ యాదవ్ సందర్శించారు. కాలుష్య నియంత్రణపై క్షేత్రస్థాయిలో అమలవుతున్న కార్యాచరణను ఆయన ప్రత్యక్షంగా పరిశీలించి ఉన్నత స్థాయి సమీక్ష నిర్వహించారు.
ఈ అత్యాధునిక డిజిటల్ కంట్రోల్ సెంటర్ ద్వారా దాదాపు 30కి పైగా వేర్వేరు సమాచార వ్యవస్థలను (Data Streams) ఒకే వేదికపైకి అనుసంధానించారు. ఇందులో 111 రియల్ టైమ్ ఎయిర్ క్వాలిటీ మానిటరింగ్ స్టేషన్లు, 2300 పరిశ్రమల నుంచి వచ్చే ఉద్గారాల నివేదికలు, 3200 నిర్మాణ స్థలాల్లో అమర్చిన లైవ్ సీసీటీవీ కెమెరాలు మరియు డస్ట్ సెన్సర్లు ఉన్నాయి. వీటితో పాటు ఇస్రో, ఐఏఆర్ఐ (IARI) ఉపగ్రహ సమాచారం ఆధారంగా పంజాబ్, హర్యానా రాష్ట్రాల్లో పంట వ్యర్థాల దహనం (Stubble Burning) జరిగే ప్రాంతాలను ఈ కేంద్రం ఎప్పటికప్పుడు గుర్తిస్తుంది.
గుర్తించడం, విశ్లేషించడం, తక్షణమే చర్యలు చేపట్టడం (Detect, Analyse, Act) అనే మూల సూత్రంతో 'పవన్' కేంద్రం పనిచేస్తుందని మంత్రి భూపేందర్ యాదవ్ పేర్కొన్నారు. ఎక్కడైనా నిబంధనల ఉల్లంఘన జరిగితే తక్షణమే సంబంధిత క్షేత్రస్థాయి అధికారులకు అలర్ట్ వెళ్లేలా ఆటోమేటెడ్ వ్యవస్థను రూపొందించినట్లు తెలిపారు. ఢిల్లీ, పంజాబ్, హర్యానా, రాజస్థాన్, ఉత్తరప్రదేశ్ రాష్ట్రాల్లో వాయు కాలుష్యాన్ని అడ్డుకోవడానికి శాస్త్రీయ విధానాలతో కూడిన సమగ్ర చర్యలు నిరంతరం కొనసాగుతాయని స్పష్టం చేశారు.
