అభ్యర్థుల విజ్ఞప్తికి సీఎం విజయ్ ఆమోదం: తమిళనాడు జాబ్స్‌లో భారీ వయో సడలింపు
సూర్య నేషనల్ బ్యూరో, చెన్నై:తమిళనాడులోని ప్రభుత్వ ఉద్యోగార్థులకు ఆ రాష్ట్ర ముఖ్యమంత్రి సి. జోసెఫ్ విజయ్ భారీ ఊరట కల్పించారు. రాష్ట్ర ప్రభుత్వ సర్వీసుల్లో ప్రత్యక్ష నియామకాలకు సంబంధించి గరిష్ట వయోపరిమితిని మరో ఐదేళ్ల పాటు సడలిస్తున్నట్లు అధికారికంగా ప్రకటించారు. పోటీ పరీక్షలకు సన్నద్ధమవుతున్న లక్షలాది మంది నిరుద్యోగ యువత, అభ్యర్థుల నుంచి వచ్చిన వినతులను పరిగణనలోకి తీసుకున్న ముఖ్యమంత్రి ఈ కీలక నిర్ణయం తీసుకున్నారు. ఈ సడలింపు రాబోయే ఐదేళ్ల కాలం పాటు అమల్లో ఉంటుందని ప్రభుత్వం స్పష్టం చేసింది.
ఈ తాజా ఉత్తర్వుల ప్రకారం ఇప్పటికే అమల్లో ఉన్న సాధారణ వయోపరిమితి నిబంధనలకు అదనంగా ఈ ఐదేళ్ల సడలింపు వర్తిస్తుంది. గ్రూప్-1 సర్వీసులకు సంబంధించి జనరల్ కేటగిరీ గరిష్ట వయోపరిమితి 32 నుంచి 37 ఏళ్లకు, రిజర్వ్‌డ్ కేటగిరీలకు 37 నుంచి 42 ఏళ్లకు పెరిగింది. గ్రూప్-1 కేటగిరీలో దివ్యాంగులకు జనరల్ విభాగంలో 47 ఏళ్లు, రిజర్వ్‌డ్ కేటగిరీలో గరిష్ట వయోపరిమితి 52 ఏళ్ల వరకు పెరిగింది. అలాగే గ్రూప్-2, గ్రూప్-2ఏ పరీక్షల్లో జనరల్ కేటగిరీ అభ్యర్థుల అర్హత వయస్సు 30 నుంచి 35 ఏళ్లకు, దివ్యాంగ జనరల్ అభ్యర్థులకు 40 నుంచి 45 ఏళ్లకు పెంచారు.
నోటిఫికేషన్ల జారీలో జాప్యం, వయోపరిమితి దాటిపోతుందన్న ఆందోళనలో ఉన్న వేలాది మంది నిరుద్యోగులకు ప్రభుత్వ నిర్ణయం కొత్త ఆశలు చిగురింపజేసింది. ప్రభుత్వ సర్వీసుల్లో చేరేందుకు యువతకు సమాన అవకాశాలు కల్పించడమే తమ ప్రభుత్వ ధ్యేయమని అధికార యంత్రాంగం పేర్కొంది. ముఖ్యమంత్రి తీసుకున్న ఈ నిర్ణయంపై రాష్ట్రవ్యాప్తంగా నిరుద్యోగ సంఘాలు, విద్యార్థి వర్గాలు హర్షం వ్యక్తం చేస్తున్నాయి.
