సైబర్‌ నేరాల పట్ల అప్రమత్తంగా ఉండాలి...
వృద్ధులకు అవగాహన కల్పించిన జోనల్‌ కమిషనర్‌ అమిత్‌ నారాయణ,ఇన్స్పెక్టర్ ఏ.శ్రీధర్ కుమార్
చందానగర్,మేజర్ న్యూస్ : సైబర్‌ నేరగాళ్ల మాయమాటలకు మోసపోవద్దని, అపరిచిత వ్యక్తుల నుంచి వచ్చే ఫోన్‌ కాల్స్‌, సందేశాల పట్ల అప్రమత్తంగా ఉండాలని శేరిలింగంపల్లి జోనల్‌ కమిషనర్‌ అమిత్‌ నారాయణ ఐఏఎస్‌,చందానగర్ ఇన్స్పెక్టర్ ఏ. శ్రీధర్ కుమార్ సూచించారు. ముఖ్యంగా సీనియర్‌ సిటిజన్లు సైబర్‌ నేరాల పట్ల అవగాహన కలిగి ఉండాలని ఆయన పేర్కొన్నారు.ఈ మేరకు చందానగర్ లోని పీజేఆర్‌ స్టేడియంలో సాయంత్రం వాకింగ్‌కు వచ్చే వారిని ఉద్దేశించి సుమారు 60 మంది పాల్గొన్న సైబర్‌ క్రైమ్‌ అవగాహన కార్యక్రమాన్ని నిర్వహించారు. ఈ కార్యక్రమానికి ముఖ్య అతిథిగా హాజరైన జోనల్‌ కమిషనర్‌ అమిత్‌ నారాయణ వివిధ రకాల సైబర్‌ మోసాల గురించి వివరించారు.డిజిటల్‌ అరెస్ట్‌ పేరుతో చేసే మోసాలు, ఓటీపీ ఫ్రాడ్స్‌, అపరిచిత మొబైల్‌ యాప్‌ల ద్వారా జరిగే మోసాలు, నకిలీ వీడియో కాల్స్‌, ఇతర ఆన్‌లైన్‌ మోసాల పట్ల ప్రజలు అప్రమత్తంగా ఉండాలని సూచించారు. గుర్తుతెలియని వ్యక్తులకు ఓటీపీలు, బ్యాంకు ఖాతాల వివరాలు, వ్యక్తిగత సమాచారాన్ని వెల్లడించవద్దని, అనుమానాస్పద లింకులను క్లిక్‌ చేయవద్దని వివరించారు. సైబర్‌ నేరగాళ్ల వలలో పడకుండా తీసుకోవాల్సిన జాగ్రత్తలను తెలియజేశారు.ఈ కార్యక్రమంలో ముఖ్యంగా వృద్ధులకు సైబర్‌ భద్రతపై అవగాహన కల్పించడంతో పాటు, డిజిటల్‌ లావాదేవీలు నిర్వహించే సమయంలో అప్రమత్తత అవసరమని అధికారులు సూచించారు.ఈ కార్యక్రమంలో మియాపూర్‌ సర్కిల్‌ మున్సిపల్‌ అధికారులు, పోలీసు శాఖ అధికారులు పాల్గొన్నారు. ప్రజల్లో సైబర్‌ నేరాలపై అవగాహన పెంపొందించడమే లక్ష్యంగా ఈ కార్యక్రమాన్ని నిర్వహించారు.
