ప్రత్యేకావసరాల పిల్లలకు అండగా ప్రత్యేక యాప్

చిట్యాల, మేజర్ న్యూస్, పాఠశాల విద్యార్థుల అంగవైకల్యాన్ని  గుర్తించేందుకు కేంద్ర విద్యా శాఖ రూపొందించిన ప్రశస్త్‌ యాప్‌ విద్యార్థులకు అండగా నిలువనుందని మండల విద్యాశాఖ అధికారి కొడపాక రఘుపతి అన్నారు. శుక్రవారం మండల కేంద్రంలోని ప్రభుత్వ ఉన్నత పాఠశాలలో మండల పరిధిలోని పాఠశాలల ప్రధానోపాధ్యాయులతో ఎన్సీఈఆర్ టి ఆదేశాల మేరకు   అవగాహన సదస్సును నిర్వహించారు. ఈ సందర్భంగా ఎంఈఓ మాట్లాడుతూ... అంగవైకల్యం ఉన్న విద్యార్థులను గుర్తించి వారికి అవసరమైన విద్యావనరులు, ప్రభుత్వ సహాయం అందించేందుకు ఎన్‌సీఈ ఆర్‌టీ రూపొందించినదే 'ప్రశస్త్‌' మొబైల్‌ యాప్‌ అని తెలిపారు. ప్రభుత్వ, ప్రైవేట్‌ పాఠశాలలతో పాటు గురుకుల, కేజీబీ విద్యాలయాల్లో ప్రశస్త్‌ యాప్‌ ద్వారా 21 రకాల వైకల్యాలను పరీక్షించేందకు ఈ యాప్‌ను ఉపయోగిస్తారన్నారు. ప్రత్యేక అవసరాలు ఉన్న పిల్లలను పాఠశాల స్థాయి లోనే గుర్తించడం ద్వారా వారికి మెరుగైన వైద్యం అందించడానికి సిఫారసు చేయడం,  వైకల్య సర్టిఫికెట్‌ తీసుకోవడానికి సలుభం అవుతుందని పేర్కొన్నారు.  దివ్యాంగుల్లో దాగి ఉన్న ప్రతిభను గుర్తించాలని చెప్పారు. బహుళ ప్రయోజనాలున్న ప్రశస్త్‌ యాప్‌ను ప్రతి ఉపాధ్యాయుడు తప్పనిసరిగా వినియోగించాలని ఆదేశించారు. 
ఈ కార్యక్రమంలో స్పెషల్ ఎడ్యుకేటర్ రాజేష్, ఐఈ ఆర్ పిలు సంద మహేందర్, చిక్కుల నరేష్, వివిధ పాఠశాలల ఉపాధ్యాయ, ఉపాధ్యాయురాళ్లు పాల్గొన్నారు.

రిపోర్టర్; సదానందం, చిట్యాల, జయశంకర్ భూపాలపల్లి జిల్లా