నవంబర్ 3 న జాతీయ వాదుల సంగమం పూర్వ విద్యార్ధి పరిషత్ నేత గుండా చంద్రశేఖర్ గుప్తా

కర్మన్ ఘాట్, మేజర్ న్యూస్ : నవంబర్ 3 న నాగోల్ శుభం ఫంక్షన్ హాల్ లో జాతీయ వాదుల సంగమం జరుగుతుంది అని పూర్వ విద్యార్ధి పరిషత్ నేత గుండా చంద్రశేఖర్ గుప్త తెలిపారు. శుక్రవారం ఆర్ కె పురం డివిజన్ లో ఆయన మాట్లాడుతూ తెలంగాణకు చెందిన పూర్వ విద్యార్ధి పరిషత్ నాయకులు కాసం వెంకటేశ్వర్లు కర్నాటక రాష్ట్ర బీజేపీ సహా ఇంచార్జిగా నియమించిన సందర్భంగా ఈ సదస్సు జరుగుతుంది అని ఆయన వివరించారు. 

దేశ సమైక్యత కోసం జాతీయ వాదులు అందరినీ ఒక్కతాటిపైకి తీసుకురావడానికి ఈ సంగమం దోహదపడుతుంది అని ఆయన అభిప్రాయపడ్డారు. ముఖ్యంగా ఉస్మానియా, కాకతీయ విశ్వవిద్యాలయాల నుంచి పూర్వ విద్యార్ధులు పెద్ద ఎత్తున ఈ సంగమానికి హాజరు కానున్నారు అని ఆయన తెలిపారు. దేశభక్తి, దైవభక్తి, సమాజ పరిరక్షణ కోసం జాతీయ భావాలు కలిగిన విద్యార్థులు ఈ సదస్సుకు హాజరు కావాలని చంద్రశేఖర్ గుప్తా విజ్ఞప్తి చేశారు. ఈ కార్యక్రమానికి పూర్వ విద్యార్ధి పరిషత్ నాయకులు అయిన సునీల్ బన్సాల్, కాసం వెంకటేశ్వర్లు తదితరులు హాజరు కానున్నారు అని ఆయన వివరించారు.