హైదరాబాద్‌లో కుండపోత వర్షం: జలమయమైన శ్రీకృష్ణానగర్, యూసుఫ్‌గూడ రహదారులు
జూబ్లీహిల్స్, మేజర్ న్యూస్: హైదరాబాద్ నగరంలో సాయంత్రం దాదాపు గంటపాటు కుండపోత వర్షం విరుచుకుపడింది. కేవలం గంట వ్యవధిలోనే ఏకంగా 6 సెంటీమీటర్ల వర్షపాతం నమోదైంది. ఈ వర్షాకాలంలో ఏకధాటిగా గంటపాటు వర్షం కురవడం, అలాగే అత్యధిక సమయం పాటు వర్షం పడటం ఈ ఏడాదిలో ఇదే తొలిసారి కావడం విశేషం.
ఈ వర్షాకాలంలో నగరంలో ఇప్పటివరకు 30 శాతం వర్షపాతం లోటు నమోదు కాగా, ఇప్పటివరకు కేవలం ఐదు సార్లు మాత్రమే భారీ వర్షాలు కురిసాయి. సాయంత్రం కురిసిన ఈ భారీ వర్షానికి నగరంలోని యూసుఫ్‌గూడ, శ్రీకృష్ణానగర్ పరిసర ప్రాంతాల్లో రహదారులన్నీ జలమయమయ్యాయి. స్వల్ప వ్యవధిలోనే విపరీతమైన వర్షం పడటంతో డ్రైనేజీలు పొంగిపొర్లి, రోడ్లన్నీ చెరువులను తలపించాయి.
పలు ప్రధాన రహదారుల్లో మోకాళ్ల లోతు వరకు వర్షపు నీరు చేరడంతో వాహన రాకపోకలు తీవ్రంగా స్తంభించిపోయాయి. సరిగ్గా ఆఫీస్ వేళలు ముగిసే సాయంత్రం సమయంలో వర్షం పడటంతో విధులు ముగించుకుని ఇళ్లకు తిరుగుపయనమైన ఉద్యోగులు, రోజువారీ కూలీలు, విధులకు వెళ్లి వస్తున్న కార్మికులు తీవ్ర ఇబ్బందులు ఎదుర్కొన్నారు. అలాగే ప్రైవేట్ కోచింగ్ సెంటర్లు, కళాశాలల నుంచి ఇళ్లకు వెళ్లే విద్యార్థులు రోడ్లపై నిలిచిన నీటిలో నడవలేక, తీవ్ర ఆటంకాలను ఎదుర్కొన్నారు.
శ్రీకృష్ణానగర్ లోతట్టు ప్రాంతాల్లో రహదారులపైకి భారీగా వరద నీరు చేరడంతో గంటల తరబడి ట్రాఫిక్ జామ్ ఏర్పడి, వాహనాలు అడుగు ముందుకు పడని పరిస్థితి నెలకొంది. నీటి ప్రవాహం కారణంగా ద్విచక్ర వాహనదారులు, బాటసారులు తీవ్ర అవస్థలు పడ్డారు. జీహెచ్‌ఎంసీ సిబ్బంది తక్షణమే రంగంలోకి దిగి నీటి ప్రవాహానికి ఉన్న అడ్డంకులను తొలగించి, రద్దీని క్రమబద్ధీకరించాలని స్థానిక ప్రజలు కోరుతున్నారు.
