యాసంగిలో ఆరుతడి పంటల సాగుకు రైతులు ప్రాధాన్యమివ్వాలి - మండల వ్యవసాయ అధికారి జి. కిరణ్మయి

సూర్య, మందమర్రి : సాగు భూముల సంరక్షణతో పాటు నేల ఆరోగ్యాన్ని కాపాడుతూ, అందుబాటులో ఉన్న నీటి వనరులను సమర్థంగా వినియోగించుకోవాలని మండల వ్యవసాయ అధికారి జి. కిరణ్మయి రైతులకు సూచించారు. యాసంగి సీజన్‌లో వరి సాగును తగ్గించి, ఆరుతడి పంటల సాగును ప్రోత్సహించాలని పిలుపునిచ్చారు. బుధవారం మండలంలోని అందుగులపేట గ్రామ పంచాయతీ కార్యాలయంలో వ్యవసాయ శాఖ ఆధ్వర్యంలో నిర్వహించిన ఖేత్ బచావో అభియాన్ (సాగు భూమి సంరక్షణ) కార్యక్రమంలో ఆమె రైతులకు పలు సూచనలు చేశారు. ఈ సందర్భంగా కిరణ్మయి మాట్లాడుతూ.. నీటి లభ్యతకు అనుగుణంగా పంటల సాగు చేపట్టాలని, నూనెగింజలు, పప్పుధాన్యాలు, ఉద్యాన పంటలను సాగు చేయడం ద్వారా పంటల వైవిధ్యీకరణకు ప్రాధాన్యమివ్వాలని కోరారు. రసాయన ఎరువుల వినియోగాన్ని తగ్గిస్తూ సహజ ఎరువులను ప్రోత్సహించాలని, నేల సారాన్ని పెంపొందించేందుకు సుస్థిర పోషక యాజమాన్య పద్ధతులను అవలంబించాలని సూచించారు. సహజ వ్యవసాయంతో పాటు నీరు, భూమి వంటి ప్రకృతి వనరులను పరిరక్షించుకోవాల్సిన బాధ్యత ప్రతి రైతుపై ఉందన్నారు. వరి కోతల అనంతరం ఖాళీగా ఉండే భూములను సమర్థంగా వినియోగించుకోవాలని, పంట అవశేషాలను పర్యావరణానికి హాని కలగకుండా నిర్వహించాలని తెలిపారు. పంట వ్యర్థాలను పొలాల్లో తగులబెట్టడం వల్ల నేలలోని పోషకాలు దెబ్బతినే అవకాశం ఉన్నందున, వాటి దహనాన్ని నివారించాలని సూచించారు. సాగు భూముల సంరక్షణ, నీటి పొదుపు, పంటల వైవిధ్యీకరణతో వ్యవసాయాన్ని మరింత లాభదాయకంగా మార్చుకోవచ్చని పేర్కొన్నారు. ఈ కార్యక్రమంలో వ్యవసాయ విస్తరణ అధికారి ఎస్. కనకరాజు, గ్రామ సర్పంచ్ ముత్యం రమ, పంచాయతీ కార్యదర్శి వీరేందర్, పలువురు రైతులు పాల్గొన్నారు.