విద్యుత్ శాఖ నిర్లక్ష్యంతో గిరిజనుడికి తీవ్ర గాయాలు

సూర్య జైనూర్: కొమురం భీం ఆసిఫాబాద్ జిల్లా జైనూర్ మండలం పార గ్రామపంచాయతీ పరిధిలో విద్యుత్ శాఖ అధికారుల నిర్లక్ష్యంతో ప్రమాదం చోటుచేసుకుంది. వీధి దీపాలు ఏర్పాటు చేస్తున్న సమయంలో విద్యుత్ షాక్ తగిలి కినక రాము (38) తీవ్రంగా గాయపడ్డాడు.

సోమవారం సర్పంచ్ మెస్రం జంగుబాయి జ్ఞానేశ్వర్ ఆధ్వర్యంలో విద్యుత్ స్తంభాలకు వీధి దీపాలు అమర్చే పనులు చేపట్టారు. ఈ క్రమంలో విద్యుత్ శాఖ అధికారులు ఎల్‌సీ ఇచ్చామని సమాచారం ఇవ్వడంతో రాము స్తంభం ఎక్కి బల్బు అమర్చుతుండగా అకస్మాత్తుగా విద్యుత్ సరఫరా జరిగి షాక్‌కు గురయ్యాడు. దీంతో వైర్లు, స్తంభానికి చిక్కుకుని తీవ్రంగా గాయపడ్డాడు. వెంటనే స్పందించిన గ్రామస్తులు విద్యుత్ శాఖ అధికారులకు సమాచారం అందించడంతో విద్యుత్ సరఫరా నిలిపివేశారు. అనంతరం 108 అంబులెన్స్‌కు సమాచారం అందించి రామును ఆదిలాబాద్ రిమ్స్ ఆసుపత్రికి తరలించారు. ప్రస్తుతం అక్కడ చికిత్స పొందుతున్నాడు. విద్యుత్ శాఖ అధికారులు సరైన సమాచారం ఇవ్వకపోవడం, నిర్లక్ష్యంగా వ్యవహరించడం వల్లే ఈ ప్రమాదం జరిగిందని సర్పంచ్ ఆరోపించారు. ఈ ఘటనపై విద్యుత్ శాఖ ఏఈ లచ్చన్నను వివరణ కోరగా, విద్యుత్ షాక్ ఘటన తన దృష్టికి రాలేదని, వివరాలు తెలుసుకుంటానని తెలిపారు.ఈ ఘటనపై సమగ్ర విచారణ జరిపి బాధ్యులపై చర్యలు తీసుకోవడంతో పాటు తీవ్రంగా గాయపడిన గిరిజనుడు కినక రాముకు తగిన న్యాయం చేయాలని గ్రామస్తులు కోరుతున్నారు.