కీసర పోలీస్ స్టేషన్ పరిధిలో ట్రాన్స్‌జెండర్ అనుమానాస్పద మృతి
కీసర, మేజర్ న్యూస్ : కీసర పోలీస్ స్టేషన్ పరిధిలో విషాద ఘటన చోటుచేసుకుంది. కీసర–ఘట్‌కేసర్ ఓఆర్ఆర్ బైపాస్ సమీపంలోని రాంపల్లి దాయర ఔటర్ బ్రిడ్జి కింద ఓ ట్రాన్స్‌జెండర్ మృతి చెంది ఉండటాన్ని పోలీసులు గుర్తించారు. మృతురాలిని కీసర మండలం బోగారం గ్రామానికి చెందిన స్వీటీ అలియాస్ శేఖర్ (30–35)గా గుర్తించినట్లు పోలీసులు తెలిపారు.శేఖర్ కనిపించడం లేదంటూ రెండు రోజుల క్రితం కుటుంబ సభ్యులు కీసర పోలీస్ స్టేషన్‌లో ఫిర్యాదు చేశారు. ఈ మేరకు సీఐ ఎల్లక్షన్ రెడ్డి ఆధ్వర్యంలో పోలీసులు విచారణ చేపట్టారు. ఈ క్రమంలో రాంపల్లి దాయర ఔటర్ బ్రిడ్జి కింద మృతదేహాన్ని గుర్తించారు. ప్రాథమికంగా ఆత్మహత్యగా అనుమానిస్తున్నప్పటికీ, మృతికి గల కారణాలు ఇంకా తెలియరాలేదని పోలీసులు వెల్లడించారు. క్లూస్ టీం సహాయంతో ఘటనా స్థలంలో ఆధారాలు సేకరించి కేసు నమోదు చేసి అన్ని కోణాల్లో దర్యాప్తు చేస్తున్నట్లు తెలిపారు.
