తూప్రాన్ ఎస్సీ, ఎస్టీ కేసుల్లో బాధితులకు త్వరగా పరిహారం అందించాలి

తూప్రాన్;మెదక్‌ జిల్లా తూప్రాన్‌ సబ్‌ డివిజన్‌ పోలీస్‌ కార్యాలయాన్ని మల్టీ జోన్‌–1 ఐజీ చంద్రశేఖర్‌ రెడ్డి వార్షిక తనిఖీల్లో భాగంగా తనిఖీ చేశారు. ఈ సందర్భంగా జిల్లా ఎస్పీ డి.వి. శ్రీనివాసరావు, ఐపీఎస్‌ ఐజీకి మొక్కను అందజేసి స్వాగతం పలికారు. ఐజీ పోలీసుల గౌరవ వందనం స్వీకరించి, కార్యాలయ ప్రాంగణంలో అరుదైన మియాజాకి రకానికి చెందిన మామిడి మొక్కను నాటారు.అనంతరం కార్యాలయ రికార్డులు, క్రైమ్‌ రిజిస్టర్లు, పెండింగ్‌, దర్యాప్తు, ట్రయల్‌ దశలో ఉన్న కేసుల వివరాలను సమీక్షించారు. గ్రేవ్‌, పోక్సో కేసుల్లో నాణ్యమైన దర్యాప్తు చేపట్టి, నిందితులకు శిక్షలు పడేలా చర్యలు తీసుకోవాలని, ప్రతి కేసులో నిర్దేశిత ఎస్‌ఓపీని పాటించాలని అధికారులను ఆదేశించారు.ఎస్సీ, ఎస్టీ కేసుల్లో బాధితులకు త్వరితగతిన పరిహారం అందేలా సంబంధిత శాఖలతో సమన్వయం చేసుకోవాలని సూచించారు. ఐసీజేఎస్‌ (ICJS) వ్యవస్థ పర్యవేక్షణకు ప్రత్యేక సిబ్బందిని నియమించాలని, ఈ-సాక్ష్య (e-Sakshya), ఆన్‌సైట్‌ ఎఫ్‌ఐఆర్‌ విధానాలను సమర్థవంతంగా అమలు చేయాలని, నిర్ణీత గడువులోగా ఛార్జ్‌షీట్లు దాఖలు చేయాలని స్పష్టం చేశారు.దొంగతనాల నివారణకు రాత్రి గస్తీ, వాహన తనిఖీలు ముమ్మరం చేసి, అనుమానితులపై నిఘా ఉంచాలని ఆదేశించారు.కార్యాలయాల్లో 5ఎస్‌ విధానాన్ని అమలు చేస్తూ రికార్డులను క్రమపద్ధతిలో నిర్వహించాలని, గంజాయి అక్రమ రవాణా, విక్రయాలను అరికట్టేందుకు కఠిన చర్యలు తీసుకోవాలని ఆదేశించారు. రౌడీషీటర్లు, అసాంఘిక శక్తులపై నిరంతర నిఘా కొనసాగించాలని, సైబర్‌ నేరాలు, ట్రాఫిక్‌ నియమాలపై ప్రజలకు అవగాహన కల్పిస్తూ గ్రామాల్లో సీసీ కెమెరాల ఏర్పాటును ప్రోత్సహించాలని సూచించారు.ఈ  తనిఖీలో మెదక్ జిల్లా అదనపు ఎస్పీ విక్రాంత్ కుమార్ సింగ్ ఐపీఎస్, తూప్రాన్ డియస్పి నరేందర్ గౌడ్, సీఐ లు సైదా, వెంకట రాజా గౌడ్, ఎసై లు శివానందం, సుభాష్ గౌడ్,  యాదగిరి, గంగరాజు, మండలాల ఎస్ఐలు సిబ్బంది తదితరులు ఉన్నారు.