తిమ్మాపూర్‌లో వృద్ధురాళ్ల వరుస హత్యల కేసు ఛేదన
సూర్య కరీంనగర్ ప్రతినిధి: తిమ్మాపూర్ మండలం వచ్చనూర్ గ్రామంలో ఒంటరిగా నివసిస్తున్న ఇద్దరు వృద్ధురాళ్లను ఆభరణాల కోసం హత్య చేసిన కేసును పోలీసులు ఛేదించారు. ఈ ఘటనకు సంబంధించి నలుగురు నిందితులను అరెస్ట్ చేయగా, మరో నిందితుడు పరారీలో ఉన్నట్లు పోలీస్ కమిషనర్ గౌస్ ఆలం తెలిపారు.
ఈ ఏడాది ఆగస్టు 16న 103 ఏళ్ల ఉప్పులేటి భూదమ్మను, అక్టోబర్ 31న 80 ఏళ్ల ఉప్పులేటి లక్ష్మి అలియాస్ లచ్చవ్వను నిందితులు హత్య చేసి వారి వద్దనున్న బంగారు, వెండి ఆభరణాలను అపహరించారు. వృద్ధాప్యం కారణంగా సహజ మరణాలుగా భావించేలా నిందితులు వ్యవహరించినట్లు పోలీసుల దర్యాప్తులో వెల్లడైంది.
శనివారం అలుగునూర్ చౌరస్తా వద్ద వాహనాల తనిఖీల సమయంలో ఇద్దరు నిందితులను అదుపులోకి తీసుకుని విచారించగా, రెండు హత్యల్లో తమ ప్రమేయాన్ని వెల్లడించినట్లు పోలీసులు తెలిపారు. అనంతరం మరో ఇద్దరిని అరెస్ట్ చేశారు.
అరెస్టయిన వారిలో మద్దూరి సాయి, కిన్నెర రాజు, ఎల్కతుర్తి రాజు, మానుకోల పవన్ కుమార్ ఉన్నారు. కనపర్తి మణికంఠ పరారీలో ఉన్నాడు. నిందితుల నుంచి టీవీఎస్ జూపిటర్ స్కూటీ, బజాజ్ పల్సర్ బైక్, వెండి కడియాలు, ఐదు సెల్‌ఫోన్లు, ఇతర వస్తువులను స్వాధీనం చేసుకున్నారు.
కేసును ఛేదించిన రూరల్ ఏసీపీ, తిమ్మాపూర్ సీఐ, ఎస్సైలు, పోలీసు సిబ్బందిని సీపీ గౌస్ ఆలం అభినందించారు. గ్రామీణ ప్రాంతాల్లో వృద్ధులు ఒంటరిగా ఉండకుండా కుటుంబ సభ్యులు జాగ్రత్తలు తీసుకోవాలని, విలువైన ఆభరణాల విషయంలో అప్రమత్తంగా ఉండాలని, గ్రామాల్లో సీసీ కెమెరాలు ఏర్పాటు చేసుకోవాలని పోలీసులు సూచించారు. అనుమానాస్పద వ్యక్తులు, అసాంఘిక కార్యకలాపాలపై సమాచారం అందించాలని కోరారు.
