ప్రతి ఇంటా సుఖసంతోషాలు, ఆయురారోగ్యాలు, అభివృద్ధి వెలుగులు నిండాలి

నెల్లూరు కలెక్టరేట్, మేజర్ న్యూస్  :   దీపావళి పర్వదినాన్ని పురస్కరించుకుని నెల్లూరు జిల్లా ప్రజలందరికీ జిల్లా కలెక్టర్ హిమాన్షు శుక్లా హృదయపూర్వక శుభాకాంక్షలు తెలియజేశారు. చెడుపై మంచి, చీకటిపై వెలుగు సాధించిన విజయానికి ప్రతీకగా దీపావళి పండుగను జరుపుకుంటామని పేర్కొన్నారు. ఈ పర్వదినం ప్రతి ఒక్కరి జీవితాల్లో నూతన ఆశలు, ఆనందాలు, సుఖసంతోషాలు నింపాలని ఆకాంక్షించారు. జిల్లా ప్రజలందరూ ఐకమత్యం, సోదరభావం, పరస్పర సహకారంతో దీపావళి పండుగను ఆనందోత్సాహాల మధ్య జరుపుకోవాలని కలెక్టర్ పిలుపునిచ్చారు. ప్రతి కుటుంబంలో సంతోషం వెల్లివిరియాలని, ప్రజలందరూ ఆయురారోగ్యాలతో, సుఖసంతోషాలతో జీవించాలని ఆకాంక్షించారు. జిల్లా అభివృద్ధి, ప్రజల సంక్షేమమే లక్ష్యంగా యంత్రాంగం సమన్వయంతో పనిచేస్తోందని కలెక్టర్ తెలిపారు. మౌలిక సదుపాయాల కల్పనతో పాటు విద్య, వైద్యం, వ్యవసాయం, పారిశ్రామిక రంగాల అభివృద్ధికి ప్రత్యేకంగా కృషి చేస్తున్నట్లు పేర్కొన్నారు. ప్రభుత్వ సంక్షేమ, అభివృద్ధి కార్యక్రమాలను అర్హులైన ప్రతి ఒక్కరికీ చేరువ చేస్తూ, ప్రజల భాగస్వామ్యంతో నెల్లూరు జిల్లాను అన్ని రంగాల్లో అభివృద్ధి పథంలో ముందుకు తీసుకెళ్లేందుకు కృషి చేస్తున్నామని వివరించారు. దీపావళి వేడుకలను పర్యావరణహితంగా, సురక్షితంగా జరుపుకోవాలని కలెక్టర్ సూచించారు. బాణసంచా కాల్చే సమయంలో తగిన జాగ్రత్తలు పాటించాలని, ముఖ్యంగా చిన్నారుల భద్రతపై తల్లిదండ్రులు ప్రత్యేక శ్రద్ధ వహించాలని కోరారు. ఈ దీపావళి పండుగ జిల్లా ప్రజల జీవితాల్లో సరికొత్త వెలుగులు నింపాలని, ప్రతి ఒక్కరికీ శాంతి, సంతోషం, సౌభాగ్యం కలగాలని, నెల్లూరు జిల్లా మరింత అభివృద్ధి సాధించాలని కలెక్టర్ హిమాన్షు శుక్లా ఆకాంక్షించారు.