కూటమి శ్రేణులతో విజయోత్సాహాన్ని పంచుకున్న ఎమ్మెల్యే ప్రశాంతి రెడ్డి

రాజుపాళెం,   మేజర్ న్యూస్ :   కోవూరు నియోజకవర్గ శాసనసభ్యులు శ్రీమతి వేమిరెడ్డి ప్రశాంతి రెడ్డి గారు శనివారం రాజుపాళెంలోని జీవన్ జ్యోతి కాలేజీ ప్రాంగణంలో ఏర్పాటు చేసిన ఎంపీటీసీ, జడ్పీటీసీ ఎన్నికల ఓట్ల లెక్కింపు కేంద్రాన్ని సందర్శించారు. నియోజకవర్గంలోని ఐదు మండలాల్లో జడ్పీటీసీ, ఎంపీటీసీ అభ్యర్థులు భారీ విజయాలు సాధిస్తుండటంతో, అక్కడి కూటమి నాయకులు, కార్యకర్తలు, స్థానికులతో కలిసి ఎమ్మెల్యే గారు విజయోత్సాహాన్ని పంచుకున్నారు. కౌంటింగ్ కేంద్రానికి ఎమ్మెల్యే గారు చేరుకోగానే అక్కడి వాతావరణం సందడిగా మారింది. పెద్ద సంఖ్యలో తరలివచ్చిన కూటమి నాయకులు, కార్యకర్తలు, స్థానికులు ఆమెకు ఘన స్వాగతం పలికి శుభాకాంక్షలు తెలియజేశారు. వర్షాన్ని సైతం లెక్కచేయకుండా పెద్ద ఎత్తున తరలివచ్చిన స్థానికులు, కూటమి శ్రేణులతో ఎమ్మెల్యే గారు ఆప్యాయంగా ముచ్చటించారు. ఫలితాల సందర్భంగా నెలకొన్న ఆనందాన్ని వారితో కలిసి పంచుకున్నారు. విజయం సాధించిన అభ్యర్థులకు అభినందనలు తెలియజేస్తూ, అక్కడి నాయకులు, కార్యకర్తలతో కొంతసేపు ఉత్సాహంగా గడిపారు.