టపాసుల సరదా.. జీవితాంతం పశ్చాత్తాపం కాకూడదు

                                 కంటి గాయాలు, శ్వాసకోశ సమస్యలపై కామినేని వైద్యుల హెచ్చరిక

హైదరాబాద్, మేజర్ న్యూస్ ప్రతినిధి : దీపావళి వేళ బాణాసంచా కాల్చేటప్పుడు ఏమాత్రం అజాగ్రత్తగా ఉన్నా కంటి చూపు కోల్పోయే ప్రమాదంతో పాటు కాలిన గాయాలు, శ్వాసకోశ సమస్యలు తలెత్తవచ్చని ఎల్‌బీనగర్ కామినేని ఆసుపత్రి వైద్యులు హెచ్చరించారు. ముఖ్యంగా పిల్లలు, వృద్ధులు, ఆస్తమా, సీఓపీడీ బాధితులు ప్రత్యేక జాగ్రత్తలు తీసుకోవాలని సూచించారు.కంటి వైద్య నిపుణురాలు డాక్టర్ మాధురీ పాటిల్ మాట్లాడుతూ, టపాసుల నిప్పురవ్వలు, రసాయనాల వల్ల కార్నియా, రెటీనాకు తీవ్ర గాయాలై శాశ్వతంగా చూపు కోల్పోయే ప్రమాదం ఉందన్నారు. కంటికి గాయమైతే రుద్దకూడదని, గృహ వైద్యం చేయకుండా వెంటనే వైద్యులను సంప్రదించాలని సూచించారు.సీనియర్ పల్మనాలజిస్ట్ డాక్టర్ ఇ. రవీందర్ రెడ్డి మాట్లాడుతూ, బాణాసంచా పొగలోని సూక్ష్మ ధూళి కణాలు ఆస్తమా, సీఓపీడీ బాధితుల్లో దగ్గు, ఆయాసం, శ్వాస తీసుకోవడంలో ఇబ్బందులను పెంచుతాయని తెలిపారు. వీలైనంత వరకు పొగకు దూరంగా ఉండాలని, వైద్యులు సూచించిన ఇన్హేలర్లు, అత్యవసర మందులను అందుబాటులో ఉంచుకోవాలని చెప్పారు. పిల్లలు పెద్దల పర్యవేక్షణలోనే టపాసులు కాల్చాలని, చేతిలో పట్టుకుని బాణాసంచా పేల్చరాదని వైద్యులు సూచించారు. ఇళ్లు, వాహనాలు, ఇంధన పదార్థాలకు దూరంగా ఖాళీ ప్రదేశాల్లోనే టపాసులు కాల్చాలని, ప్రథమ చికిత్స సామగ్రి, నీటిని సిద్ధంగా ఉంచుకోవాలని తెలిపారు.