తారా ప్రభుత్వ కళాశాలలో సహజసిద్ధ సౌందర్య ఉత్పత్తుల తయారీపై అవగాహన

సంగారెడ్డి,  : తారా ప్రభుత్వ కళాశాల (స్వయంప్రతిపత్తి), సంగారెడ్డిలో అంతర్గత నాణ్యతా హామీ విభాగం ఆధ్వర్యంలో, భారత వాణిజ్య మరియు పరిశ్రమల సమాఖ్య మహిళా విభాగం (ఫిక్కీ ఫ్లో), హైదరాబాద్ సహకారంతో “సహజసిద్ధ గృహ సౌందర్య ఉత్పత్తుల తయారీ” అనే అంశంపై ప్రత్యేక అవగాహనతో కూడిన ప్రాయోగిక శిక్షణ కార్యక్రమాన్ని నిర్వహించారు.ఈ కార్యక్రమానికి ముఖ్య అతిథిగా ఫిక్కీ ఫ్లో అధ్యక్షురాలు  సీతా రంజిత్ రెడ్డి హాజరయ్యారు. ప్రగతి పథ్, ఫిక్కీ ఫ్లోకు చెందిన వనరుల వ్యక్తి  సుధా మూలా, ఫిక్కీ ఫ్లో ప్రతినిధి  హెచ్.ఆర్. కల్పన పాల్గొన్నారు.ఈ సందర్భంగా వనరుల వ్యక్తులు సహజసిద్ధమైన పదార్థాలను ఉపయోగించి ఇంట్లోనే తయారు చేసుకోగలిగే వివిధ రకాల సబ్బులు, క్రీములు, శరీరానికి ఉపయోగించే స్క్రబ్‌లు తదితర సౌందర్య ఉత్పత్తుల తయారీ విధానాన్ని ప్రత్యక్షంగా ప్రదర్శించి విద్యార్థులకు వివరించారు. రసాయన పదార్థాలకు ప్రత్యామ్నాయంగా సహజ పదార్థాలను ఎలా వినియోగించుకోవాలో ప్రయోగాత్మకంగా తెలియజేశారు. విద్యార్థులతో పాటు అధ్యాపకులు కూడా ఎంతో ఆసక్తిగా ఈ ప్రదర్శనను వీక్షించి పలు విషయాలను తెలుసుకున్నారు.అదేవిధంగా గత నెలలో ఫిక్కీ ఫ్లో సహకారంతో కళాశాల వాణిజ్య విభాగం విద్యార్థులకు నిర్వహించిన టాలీ ప్రో శిక్షణను విజయవంతంగా పూర్తి చేసిన విద్యార్థులకు ముఖ్య అతిథి  సీతా రంజిత్ రెడ్డి ధ్రువపత్రాలను అందజేశారు.ఈ కార్యక్రమంలో కళాశాల ఇన్‌చార్జి, ఉప ప్రిన్సిపాల్ డాక్టర్ బి. సుచిత్ర సింగ్, డాక్టర్ కె. సుజాత, అంతర్గత నాణ్యతా హామీ విభాగం సమన్వయకర్త డాక్టర్ కె. వాణి, టాలీ కార్యక్రమ సమన్వయకర్త డాక్టర్ ఆర్. కరుణ తదితర అధ్యాపకులు పాల్గొన్నారు.ఈ సందర్భంగా కళాశాల ఉప ప్రిన్సిపాల్ మాట్లాడుతూ ఈ శిక్షణ కార్యక్రమం విద్యార్థుల్లో స్వయం ఉపాధి నైపుణ్యాలు, సృజనాత్మకత, సహజసిద్ధ ఉత్పత్తుల తయారీపై అవగాహన పెంపొందించేందుకు ఎంతగానో దోహదపడిందని తెలిపారు. విద్యార్థుల్లో నైపుణ్యాభివృద్ధితో పాటు ఉపాధి అవకాశాలను మెరుగుపరిచే ఇలాంటి కార్యక్రమాలను భవిష్యత్తులోనూ నిర్వహిస్తామని పేర్కొన్నారు.