సూర్య కథనానికి స్పందన :చింతపట్లలో బోరు మోటార్ కనెక్షన్ తొలగింపు

యాచారం : చింతపట్ల గ్రామపంచాయతీ బోరు నీటిని వ్యవసాయ పొలాలకు మళ్లించడంపై ‘సూర్య’ పత్రికలో ప్రచురితమైన కథనానికి స్పందన లభించింది. గ్రామపంచాయతీ సిబ్బంది వెళ్లి మోటార్ కనెక్షన్‌ను తొలగించినట్లు సమాచారం.
గ్రామంలో తాగునీటి సమస్య నెలకొన్న సమయంలో బోరు నీటిని వ్యవసాయ అవసరాలకు మళ్లించడంపై గ్రామస్తులు ఆందోళన వ్యక్తం చేశారు. ఈ సమస్యను వార్తా కథనం ద్వారా వెలుగులోకి తీసుకురావడంతో అధికారులు స్పందించి చర్యలు చేపట్టినట్లు తెలిసింది.
ప్రజలకు తాగునీటి ఇబ్బందులు కలగకుండా చూడటంతోపాటు, మూగజీవాలకు నీటి తొట్లు ఏర్పాటు చేయాలని గొర్రెల కాపరులు కోరుతున్నారు. గ్రామంలో నీటి సమస్యకు శాశ్వత పరిష్కారం చూపాలని గ్రామస్తులు సంబంధిత అధికారులను విజ్ఞప్తి చేస్తున్నారు.

కొండ్రు శివ: మేజర్ న్యూస్, యాచారం, రంగారెడ్డి జిల్లా.