రిక్వెస్ట్‌ బస్‌స్టాప్‌లో బస్సులు ఆపాలి - శ్యాంరావ్

సూర్య,కాగజ్‌నగర్‌:  కొమరం భీమ్ ఆసిఫాబాద్ జిల్లా నవేగాం, రాళ్లపేట గ్రామాల మధ్య ఉన్న రిక్వెస్ట్‌ బస్‌స్టాప్‌లో ఆర్టీసీ బస్సులు ఆపకపోవడంతో ప్రయాణికులు తీవ్ర ఇబ్బందులు ఎదుర్కొంటున్నారని కె.వి.పి.ఎస్ జిల్లా ఉపాధ్యక్షుడు బోర్కుటే శ్యాంరావ్ ఆవేదన వ్యక్తం చేశారు. ముఖ్యంగా మహిళలకు ఉచిత బస్సు ప్రయాణ పథకం ప్రారంభమైనప్పటి నుంచి ఈ బస్‌స్టాప్‌లో మహిళలను ఎక్కించుకోవడం, దింపడం లేదని ఆరోపించారు.

దీంతో మహిళలు, వృద్ధులు, అత్యవసర పనులపై రెబ్బెన, ఆసిఫాబాద్, మంచిర్యాల, కాగజ్నగర్ తదితర ప్రాంతాలకు వెళ్లే ప్రయాణికులు గంటల తరబడి బస్సుల కోసం వేచి చూడాల్సి వస్తోందన్నారు. గ్రామానికి రిక్వెస్ట్‌ బస్‌స్టాప్‌ ఉన్నప్పటికీ బస్సులు ఎందుకు ఆపడం లేదని ఆర్టీసీ అధికారులను ప్రశ్నించారు.సంబంధిత డిపో అధికారులు వెంటనే స్పందించి నవేగాం, రాళ్లపేట రిక్వెస్ట్‌ బస్‌స్టాప్‌లో నిబంధనల ప్రకారం అన్ని ఆర్టీసీ బస్సులు ఆగేలా చర్యలు తీసుకోవాలని డిమాండ్ చేశారు. గ్రామీణ ప్రయాణికులు, ముఖ్యంగా మహిళలు, విద్యార్థులు, వృద్ధుల రవాణా ఇబ్బందులను దృష్టిలో ఉంచుకుని అధికారులు సమస్యను తక్షణమే పరిష్కరించాలని కోరారు. ఈ కార్యక్రమంలో పోచయ్య పాల్గొన్నారు.