రామాయంపేటలో ప్రారంభం కాని ధాన్యం కొనుగోలు కేంద్రాలు

రామాయంపేట ; వానాకాలం వరి కోతలు ప్రారంభమైనా రామాయంపేట మండలంలో ధాన్యం కొనుగోలు కేంద్రాలు పూర్తిస్థాయిలో ప్రారంభం కాకపోవడంతో రైతులు ఆందోళనకు గురవుతున్నారు. ఆరుగాలం కష్టపడి పండించిన పంటను ఎక్కడ విక్రయించాలో తెలియక రైతులు అయోమయానికి గురవుతున్నారు. ప్రభుత్వం ప్రకటించిన మద్దతు ధరకు ధాన్యం విక్రయించుకునే అవకాశం కల్పించేందుకు అధికారులు వెంటనే కొనుగోలు కేంద్రాలను ప్రారంభించాలని రైతులు కోరుతున్నారు.
ప్రస్తుతం పలుచోట్ల వరి కోతలు ప్రారంభం కావడంతో ధాన్యాన్ని పొలాల వద్దే నిల్వ చేసుకోవాల్సిన పరిస్థితి ఏర్పడుతోందని రైతులు ఆవేదన వ్యక్తం చేస్తున్నారు. కొనుగోలు కేంద్రాలు అందుబాటులో లేకపోతే తప్పనిసరి పరిస్థితుల్లో దళారులను ఆశ్రయించి తక్కువ ధరకు పంటను విక్రయించాల్సి వస్తుందని ఆందోళన వ్యక్తం చేస్తున్నారు.
జిల్లా స్థాయిలో ధాన్యం కొనుగోళ్లకు సంబంధించి అధికారులు ఇప్పటికే ఏర్పాట్లు చేస్తున్నట్లు ప్రకటించినప్పటికీ, క్షేత్రస్థాయిలో కేంద్రాలు అందుబాటులోకి రాకపోవడంపై రైతులు ప్రశ్నిస్తున్నారు. ధాన్యం కొనుగోలు కేంద్రాల్లో తేమ కొలిచే యంత్రాలు, కాంటాలు, గన్నీ సంచులు, తాగునీరు, షెడ్లు వంటి మౌలిక సదుపాయాలు కల్పించి కొనుగోళ్లను పారదర్శకంగా నిర్వహించాలని కోరుతున్నారు.