రాజకీయాల్లో ఐదేళ్లకోసారి బ్యాలెన్స్ షీట్.. రెండోసారి అధికారంలోకి రావడం ఖాయం
హైదరాబాద్: రాజకీయాల్లో ఐదేళ్లకు ఒకసారి 'బ్యాలెన్స్ షీట్' వస్తుందని, ఎన్నికల సమయంలో కచ్చితంగా ప్రతి ఒక్కరి పనితీరును కొలుస్తామని తెలంగాణ ముఖ్యమంత్రి రేవంత్రెడ్డి స్పష్టం చేశారు. రాష్ట్రంలో కాంగ్రెస్ పార్టీ కచ్చితంగా రెండోసారి అధికారంలోకి వస్తుందని ఆయన ధీమా వ్యక్తం చేశారు.
గాంధీభవన్లో నిర్వహించిన టీపీసీసీ రాజకీయ వ్యవహారాల కమిటీ (పీఏసీ) సమావేశంలో సీఎం రేవంత్రెడ్డి పార్టీ నేతలకు కీలక దిశానిర్దేశం చేశారు. ఎన్నికల వ్యూహాలు, ఎత్తుగడలను తమకు వదిలేయాలని సూచించిన ఆయన.. పార్టీలో ఎవరేం చేస్తున్నారనే పూర్తి డేటా తమ వద్ద ఉందని వ్యాఖ్యానించారు. నేతలు బయటకు, లోపల.. అంటే ముందేం మాట్లాడుతున్నారు, వెనకేం మాట్లాడుతున్నారనే విషయాలన్నీ తమకు తెలుసంటూ పరోక్షంగా హెచ్చరికలు జారీ చేశారు. పార్టీ బలోపేతంపై ప్రతి ఒక్కరూ దృష్టి సారించాలని ఆయన పిలుపునిచ్చారు.