ప్రజావాణిని సద్వినియోగం చేసుకోవాలి

నవాబుపేట సూర్య న్యూస్: ప్రజల సమస్యల పరిష్కారానికి ప్రభుత్వం ప్రతి సోమవారం నిర్వహిస్తున్న ప్రజావాణి కార్యక్రమాన్ని మండల ప్రజలు సద్వినియోగం చేసుకోవాలని ఎంపీడీవో జయరాం నాయక్,తహసీల్దార్ సురేష్ పేర్కొన్నారు.మండల కేంద్రంలోని ఎంపీడీవో కార్యాలయంలో సోమవారం నిర్వహించిన ప్రజావాణి కార్యక్రమంలో వారు పాల్గొని ప్రజల నుంచి వినతులు స్వీకరించారు.ఈ సందర్భంగా ఎంపీడీవో మాట్లాడుతూ..ప్రజలకు ఎదురవుతున్న సమస్యలను నేరుగా అధికారుల దృష్టికి తీసుకువచ్చి పరిష్కారం పొందేందుకు ప్రజావాణి చక్కటి వేదికగా నిలుస్తుందని ఆయన అన్నారు.భూ సమస్యలు,రెవెన్యూ అంశాలు,గ్రామీణాభివృద్ధి,ప్రభుత్వ సంక్షేమ పథకాలు,ఇతర శాఖలకు సంబంధించిన సమస్యలపై ప్రజలు తమ ఫిర్యాదులను సంబంధిత అధికారులకు అందజేయవచ్చని జయరాం నాయక్ పేర్కొన్నారు.ప్రజలు తమ సమస్యలను స్పష్టంగా వివరిస్తూ అవసరమైన ఆధారాలతో వినతులు సమర్పించాలని ఆయన అన్నారు.ప్రజావాణిలో అందిన ఫిర్యాదులను సంబంధిత శాఖల అధికారులు పరిశీలించి నిబంధనల ప్రకారం పరిష్కారానికి చర్యలు తీసుకోవాలని ఆయన తెలిపారు.సోమవారం నిర్వహించిన ప్రజావాణి కార్యక్రమానికి ఒకే ఒక్క వినతిపత్రం అందినట్లు అధికారులు వెల్లడించారు.ఈ కార్యక్రమంలో వివిధ ప్రభుత్వ శాఖల అధికారులు పాల్గొన్నారు.