అయ్యవారిపల్లి అక్రమ భూ బదలాయింపుల ... ప్రజావాణిలో కలెక్టర్‌కు బాధితులు ఫిర్యాదు
* సర్వే నంబర్ 115లో అక్రమంగా జరిగిన భూ బదలాయింపులపై చర్యలు తీసుకోవాలని వినతి
* భూమి యజమాని, ప్లాట్ల కొనుగోలుదారుల ఉమ్మడిగా వినతి
* ఇప్పటికే తహసీల్దార్, భూభారతి ఆపరేటర్లపై సస్పెన్షన్ వేటు
ఉప్పునుంతల, సూర్య న్యూస్:
ఉప్పునుంతల మండలం అయ్యవారిపల్లి గ్రామంలోని సర్వే నంబర్ 115లో అక్రమ భూ బదలాయింపుల వ్యవహారంపై బాధితులు మరోసారి అధికారులను ఆశ్రయించారు. ఈ మేరకు భూమి యజమాని వర్కల నాగరాజుతో పాటు ప్లాట్లు కొనుగోలు చేసిన బాధితులు సోమవారం ప్రజావాణిలో జిల్లా కలెక్టర్ హేమంత్ కేశవ్ పాటిల్‌ను కలిసి వినతిపత్రం అందజేశారు.
అనంతరం అచ్చంపేట సబ్ కలెక్టర్ సలోని చాబ్రాను కూడా కలిసి తమ సమస్యలను వివరించారు. సర్వే నంబర్ 115లో అక్రమంగా పట్టాలు బదలాయింపు జరిగినట్లు ఆరోపిస్తూ, సంబంధిత అక్రమ పట్టాలను రద్దు చేసి తమకు న్యాయం చేయాలని అధికారులను కోరారు. ఈ వ్యవహారంపై పూర్తిస్థాయిలో విచారణ చేపట్టి బాధ్యులపై చర్యలు తీసుకోవాలని విజ్ఞప్తి చేశారు.అయ్యవారిపల్లి భూ బదలాయింపుల వ్యవహారంలో ఇప్పటికే విచారణ అనంతరం తహసీల్దార్‌తో పాటు భూభారతి ఆపరేటర్లను అధికారులు సస్పెండ్ చేసిన విషయం తెలిసిందే. అయినప్పటికీ తమ భూములకు సంబంధించిన సమస్య పరిష్కారం కాలేదని బాధితులు పేర్కొంటూ, ఉన్నతాధికారులు జోక్యం చేసుకుని న్యాయం చేయాలని కోరుతున్నారు.
