అమెరికా సుప్రీంకోర్టులో దివంగత బేస్‌బాల్ దిగ్గజం రాబర్టో క్లెమెంట్ కుటుంబానికి చుక్కెదురు
సూర్య అంతర్జాతీయ డెస్క్: అమెరికాలో ప్రఖ్యాత బేస్‌బాల్ ఆటగాడు రాబర్టో క్లెమెంట్ (Roberto Clemente) పేరు మరియు చిత్రాల వినియోగానికి సంబంధించి చుట్టూ నడిచిన సుదీర్ఘన్యాయ పోరాధంలో ఆయన కుటుంబసభ్యులకు నిరాశ ఎదురైంది. ప్యూర్టో రికో ప్రభుత్వం జారీ చేసిన స్మారక లైసెన్స్ ప్లేట్లలో క్లెమెంట్ ట్రేడ్‌మార్క్‌ను, ఇమేజ్‌ను ఉపయోగించడాన్ని సవాలు చేస్తూ దాఖలైన వివాద పిటిషన్‌ను అమెరికా సుప్రీంకోర్టు సోమవారం అధికారికంగా తోసిపుచ్చింది. ఈ పరిణామంతో ఈ వివాదంపై ఉన్న అత్యున్నత న్యాయస్థానపు తలుపులు మూసుకుపోయాయి.
దివంగత లెజెండ్ రాబర్టో క్లెమెంట్ 3,000వ హిట్ సాధించిన స్మారకార్థం ప్యూర్టో రికో ప్రభుత్వం 2022లో ప్రత్యేక లైసెన్స్ ప్లేట్లు మరియు రిజిస్ట్రేషన్ ట్యాగ్‌లను ముద్రించింది. ఈ ప్రత్యేక ప్లేట్ల జారీ ద్వారా డ్రైవర్ల నుంచి అదనపు రుసుములను వసూలు చేసి మిలియన్ల డాలర్లను ప్రభుత్వం సమీకరించింది. అయితే తమ అనుమతి లేకుండా, ఎలాంటి రాయల్టీలు చెల్లించకుండా తమ తండ్రి ట్రేడ్‌మార్క్‌ను మరియు ఇమేజ్‌ను ప్రభుత్వం వాణిజ్యపరంగా వాడుకుందని ఆరోపిస్తూ క్లెమెంట్ కుమారులు మరియు వారి కుటుంబ సంస్థలు ఫెడరల్ కోర్టును ఆశ్రయించాయి. ఇది ట్రేడ్‌మార్క్ నిబంధనల ఉల్లంఘన కిందకు వస్తుందని, రాజ్యాంగ విరుద్ధమని వాదించాయి.
ఈ కేసులో గతంలో ఫెడరల్ అప్పీల్స్ కోర్టు కొంతమేర అనుకూల తీర్పునిచ్చినప్పటికీ, తుది పోరాటంగా క్లెమెంట్ కుటుంబం అమెరికా సుప్రీంకోర్టును ఆశ్రయించింది. అయితే సుప్రీంకోర్టు ఈ పిటిషన్‌ను విచారణకు స్వీకరించేందుకు నిరాకరించింది. ప్రభుత్వ అధికారిక పత్రాలు మరియు లైసెన్స్ ప్లేట్ల జారీ విషయంలో ట్రేడ్‌మార్క్ చట్టాల వర్తింపుపై దిగువ కోర్టు ఇచ్చిన తీర్పులే అమల్లో ఉంటాయని స్పష్టం చేసింది. ఈ నిర్ణయంతో ప్యూర్టో రికో ప్రభుత్వానికి ఊరట లభించగా, క్లెమెంట్ వారసులకు ఎదురుదెబ్బ తగిలింది.
