ప్రైవేట్ చిట్టీల పేరుతో రూ.55.33 లక్షల టోకరాా..
కొత్తగూడెం క్రైమ్, సూర్య (మేజర్ న్యూస్) అధిక లాభాల ఆశచూపి, ప్రైవేట్ చిట్టీల పేరుతో అమాయక ప్రజలను మోసగించిన ముగ్గురు నిందితులను కొత్తగూడెం త్రీ టౌన్ పోలీసులు అరెస్ట్ చేసినట్లు కొత్తగూడెం డీఎస్పీ ఆదినారాయణ వెల్లడించారు. సోమవారం స్థానిక త్రీ టౌన్ పోలీస్ స్టేషన్లో ఏర్పాటు చేసిన విలేకరుల సమావేశంలో ఆయన మాట్లాడారు. కొత్తగూడెం పట్టణంలోని న్యూ గొల్లగూడెంకు చెందిన కట్టుల సరోజ, కట్టుల చంద్రకళ, కట్టుల కుమార్ అనే ముగ్గురూ కలిసి ఎలాంటి అధికారిక అనుమతులు లేకుండా మొత్తం 11 ప్రైవేట్ చిట్టీలను నిర్వహించారని తెలిపారు. వివిధ వర్గాల ప్రజల నుంచి విడతలవారీగా ఏకంగా రూ.55,33,745 వసూలు చేశారన్నారు. అయితే, గడువు ముగిసిన తర్వాత ఖాతాదారులకు డబ్బులు చెల్లించకుండా నిందితులు కాలయాపన చేస్తూ వచ్చారని, బాధితుల ఫిర్యాదు మేరకు కొత్తగూడెం త్రీ టౌన్ పోలీస్ స్టేషన్లో క్రైమ్ నంబర్ 188/2026 కింద కేసు నమోదు చేసి దర్యాప్తు చేపటైనట్లు తెలిపారు. సోమవారం కొత్తగూడెం రైల్వే స్టేషన్ ప్రాంతంలో నిందితులు సంచరిస్తున్నట్లు త్రీ టౌన్ ఇన్‌స్పెక్టర్ ఇంద్రసేనారెడ్డికి పక్కా సమాచారం అందడంతో, ఆయన సిబ్బందితో కలిసి వెంటనే అప్రమత్తమై ముగ్గురు నిందితులను అదుపులోకి తీసుకున్నారు. వారి వద్ద నుంచి చిట్టీల లావాదేవీలకు సంబంధించిన ఐదు రికార్డు పుస్తకాలను (బుక్స్) స్వాధీనం చేసుకున్నారని వివరించారు. అనంతరం అరెస్ట్ చేసిన ముగ్గురు నిందితులను న్యాయస్థానం ఎదుట హాజరుపరిచినట్లు వెల్లడించారు.
