సూర్య కరీంనగర్ ప్రతినిధి :ఎన్నికల వరకే రాజకీయాలని, ఎన్నికల అనంతరం జిల్లా అభివృద్ధే లక్ష్యంగా ప్రజాప్రతినిధులందరం సమష్టిగా పనిచేస్తామని రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ అన్నారు. సోమవారం కరీంనగర్ మున్సిపల్ కార్పొరేషన్ పరిధిలో కేంద్ర మంత్రి బండి సంజయ్‌తో కలిసి 46వ డివిజన్‌లో రూ.1.50 కోట్ల UIDF నిధులతో బాక్స్ టైప్ డ్రెయిన్ నిర్మాణానికి శంకుస్థాపన చేశారు. అనంతరం 23వ డివిజన్ సీతారాంపూర్, రెడ్డి ఫంక్షన్ హాల్ రోడ్డు ప్రాంతాల్లో రూ.65 లక్షల UIDF, రూ.34 లక్షల MGF నిధులతో చేపట్టనున్న అభివృద్ధి పనులకు శంకుస్థాపన చేశారు.ఈ సందర్భంగా మంత్రి మాట్లాడుతూ ఉమ్మడి కరీంనగర్ జిల్లాలో పెండింగ్‌లో ఉన్న సాగునీటి ప్రాజెక్టులను పూర్తి చేయడంతో పాటు విద్య, వైద్యం, పారిశ్రామిక రంగాలు, మౌలిక సదుపాయాలు, పర్యాటక రంగాల అభివృద్ధికి కృషి చేస్తామన్నారు. భీమదేవరపల్లి, రాజన్న సిరిసిల్ల జిల్లాల్లో నవోదయ విద్యాలయాలు, జమ్మికుంట, హుస్నాబాద్‌లో కేంద్రీయ విద్యాలయాల ఏర్పాటుకు ప్రతిపాదనలు చేశామని తెలిపారు. అసంపూర్తిగా ఉన్న మెడికల్ కళాశాల నిర్మాణం, డబుల్ బెడ్‌రూమ్ ఇళ్ల పనులు పూర్తి చేసి ప్రజలకు అందించేలా చర్యలు తీసుకుంటామన్నారు. వేములవాడ, కొండగట్టు, ధర్మపురి, కాళేశ్వరం, కొత్తకొండ ఆలయాలతో పాటు ఎలగందుల ఖిల్లా పర్యాటక అభివృద్ధికి కృషి చేస్తామన్నారు. కేంద్ర, రాష్ట్ర ప్రభుత్వాల నుంచి నిధులు తీసుకొచ్చి ఉమ్మడి కరీంనగర్ జిల్లాను ఉత్తర తెలంగాణలో అభివృద్ధి చెందిన జిల్లాగా తీర్చిదిద్దుతామని పేర్కొన్నారు.ఈ కార్యక్రమంలో మేయర్ కొలగాని శ్రీనివాస్, డిప్యూటీ మేయర్ సునీల్ రావు, స్థానిక కార్పొరేటర్ మల్లికార్జున రాజేందర్, గుమ్మడి రాజ్ కుమార్, మున్సిపల్ కమిషనర్ ప్రఫుల్ దేశాయ్, లైబ్రరీ చైర్మన్ సత్తు మల్లేష్, మార్కెట్ కమిటీ చైర్మన్ ఆకుల నర్సయ్య, ఇతర ప్రజాప్రతినిధులు, నాయకులు, అధికారులు పాల్గొన్నారూ.
