కొడంగల్ మెగా రైతు మేళాకు షాబాద్ నుంచి మహిళా రైతుల భారీ తరలింపు

షాబాద్, మేజర్ న్యూస్ (నవంబర్ 09)

తెలంగాణ రాష్ట్ర ప్రభుత్వం వ్యవసాయ, సహకార శాఖ ఆధ్వర్యంలో కొడంగల్‌లో నిర్వహిస్తున్న మెగా రైతు మేళా – అగ్రో ఇండస్ట్రియల్ ఎక్స్‌పో 2026 కార్యక్రమానికి షాబాద్ మండలం నుంచి రైతులు, మహిళా రైతులు భారీ సంఖ్యలో తరలివెళ్లారు. ఈ సందర్భంగా రైతులు, మహిళా రైతులు ప్రత్యేక బస్సుల్లో కొడంగల్‌కు బయలుదేరగా, రంగారెడ్డి జిల్లా గ్రంథాలయ సంస్థ చైర్మన్ ఎలుగంటి మధుసూదన్ రెడ్డి జెండా ఊపి బస్సులను ప్రారంభించారు. అనంతరం ఆయన కూడా రైతులతో కలిసి బస్సులో ఈ కార్యక్రమానికి బయలుదేరారు. ఈ సందర్భంగా ఆయన మాట్లాడుతూ...  వ్యవసాయ రంగంలో వస్తున్న ఆధునిక సాంకేతిక పరిజ్ఞానం, నూతన సాగు పద్ధతులు, వ్యవసాయ యాంత్రీకరణ, అనుబంధ రంగాల అభివృద్ధిపై రైతులు అవగాహన పెంచుకోవాలని సూచించారు. రైతు మేళాలు రైతులకు ఎంతో ఉపయోగకరమని, ఇలాంటి కార్యక్రమాల ద్వారా నూతన వ్యవసాయ విధానాలను తెలుసుకొని అధిక దిగుబడులు సాధించేందుకు అవకాశం ఉంటుందని పేర్కొన్నారు. ఈ కార్యక్రమంలో గుడిమల్కాపూర్ మార్కెట్ వైస్ చైర్మన్ కావాలి చంద్రశేఖర్, షాబాద్ మండల కాంగ్రెస్ పార్టీ అధ్యక్షుడు గుడుపల్లి పెంటారెడ్డి, వ్యవసాయ అధికారి విజయచంద్ర, సంబంధిత క్లస్టర్ల ఏఈఓలు, సర్పంచులు ప్రభాకర్ రెడ్డి, స్వరూప, మహేందర్ గౌడ్, శాంతమ్మ యాదయ్య, సందీప్, పలువురు కాంగ్రెస్ పార్టీ నాయకులు, రైతులు, మహిళా రైతులు పాల్గొన్నారు.