అమెరికాలో మాంసపరిశ్రమను బలోపేతం చేసే దిశగా టైసన్ ఫుడ్స్ కీలక నిర్ణయం

సూర్య అంతర్జాతీయ డెస్క్: అమెరికాలో పశువుల కొరత మరియు ధరల ఒత్తిడిని ఎదుర్కొంటున్న మాంస పరిశ్రమను ఆదుకునేందుకు ప్రముఖ ఆహార దిగ్గజం 'టైసన్ ఫుడ్స్' (Tyson Foods) కీలక చర్యలకు ఉపక్రమించింది. అమెరికన్ రాంచర్‌ల (పశువుల పెంపకం దారులు) కన్సార్టియమైన 'అలైడ్ బీఫ్ కంపెనీ' (Allied Beef Company) తో దీర్ఘకాలిక వ్యూహాత్మక భాగస్వామ్యాన్ని కుదుర్చుకోనున్నట్లు సోమవారం అధికారికంగా ప్రకటించింది.

అమెరికా దేశీయ గోమాంస సరఫరా గొలుసును మరింత పటిష్టం చేసే లక్ష్యంతో ఈ ఒప్పందానికి శ్రీకారం చుట్టారు. ఈ భాగస్వామ్యంలో భాగంగా టైసన్ ఫుడ్స్, టెక్సాస్‌లోని అమారిల్లో (Amarillo) గల తమ భారీ బీఫ్ ప్రాసెసింగ్ ప్లాంట్‌లో రెండవ ఉత్పత్తి షిఫ్ట్‌ను తిరిగి ప్రారంభించనున్నట్లు వెల్లడించింది. ఇప్పటికే కొన్ని రెండవ-షిఫ్ట్ కార్యకలాపాలను ప్రారంభించామని, 2027 వేసవి నాటికి ఈ షిఫ్ట్ పూర్తిగా అందుబాటులోకి వస్తుందని పేర్కొంది.

గత కొంతకాలంగా దేశంలో పశువుల సరఫరా తగ్గిపోవడం వల్ల తమ బీఫ్ వ్యాపారంపై తీవ్ర ప్రభావం పడిందని, ఈ నూతన భాగస్వామ్యం ద్వారా రాంచర్‌లతో ప్రత్యక్ష సంబంధాలు బలపడతాయని టైసన్ ఫుడ్స్ చీఫ్ ఆపరేటింగ్ ఆఫీసర్ వెస్ మోరిస్ తెలిపారు. ఈ ప్లాంట్ పూర్తిస్థాయిలో పనిచేయడం ప్రారంభమైతే ఉత్పత్తి భారీగా పెరగడంతో పాటు స్థానికంగా పెద్దఎత్తున ఉద్యోగ అవకాశాలు లభిస్తాయని కంపెనీ వర్గాలు అంచనా వేస్తున్నాయి.