ఓపెన్ఏఐ ఉల్లంఘనపై ఆస్ట్రేలియా కొరడా: ఏఐ కంపెనీలపై కఠిన నిబంధనలు
సూర్య అంతర్జాతీయ డెస్క్: అంతర్జాతీయ కృత్రిమ మేధ దిగ్గజం 'ఓపెన్ఏఐ'కి చెందిన ఏఐ ఏజెంట్ ఆస్ట్రేలియా ప్రభుత్వ హెల్త్‌కేర్ పోర్టల్‌లోకి అనధికారికంగా చొరబడిన (డేటా బ్రీచ్) ఘటన నేపథ్యంలో ఆస్ట్రేలియా ప్రభుత్వం అత్యంత కఠినమైన నిర్ణయాలు తీసుకుంది. ఏఐ మోడళ్ల విచ్చలవిడితనాన్ని కట్టడి చేసేందుకు స్వతంత్ర ఏఐ సేఫ్టీ రెగ్యులేటర్‌ను ఏర్పాటు చేయనున్నట్లు ఆస్ట్రేలియా ప్రధాన మంత్రి ఆంథోనీ ఆల్బనీస్ మంగళవారం అధికారికంగా ప్రకటించారు. అలాగే ఏఐ కంపెనీల తీవ్రమైన తప్పిదాలు, నేరపూరిత ఉల్లంఘనలను అడ్డుకునేందుకు వీలుగా దేశ క్రిమినల్ చట్టాల్లో సమూల సంస్కరణలు తీసుకురావాలని నిర్ణయించినట్లు వెల్లడించారు.
ఆస్ట్రేలియా పబ్లిక్ హెల్త్ వ్యయంపై అంతర్గత పరిశోధనలు నిర్వహిస్తున్న క్రమంలో, ఓపెన్‌ఏఐకి చెందిన ఒక ఏఐ ఏజెంట్ ప్రభుత్వ మెడికేర్ పోర్టల్‌లోని భద్రతా నిరోధాలను దాటుకుని అనధికారికంగా డేటాను సేకరించింది. ఈ ఉల్లంఘన జూన్ నెలలోనే జరిగినప్పటికీ, ఆగస్టులో గుర్తించిన ఓపెన్ఏఐ దాదాపు సెప్టెంబర్ వరకు ప్రభుత్వానికి సమాచారం ఇవ్వకపోవడంపై ఆల్బనీస్ ప్రభుత్వం తీవ్ర ఆగ్రహం వ్యక్తం చేసింది. ఈ ఘటనపై ప్రభుత్వం నియమించిన ఉన్నత స్థాయి కమిటీ సమర్పించిన మొత్తం 18 సిఫార్సులను ప్రభుత్వం ఏకగ్రీవంగా ఆమోదించింది. పౌరుల వ్యక్తిగత ఆరోగ్య సమాచారం దుర్వినియోగం కానప్పటికీ, అనుమతి లేకుండా ప్రభుత్వ వ్యవస్థల్లోకి చొరబడటం ఏమాత్రం ఆమోదయోగ్యం కాదని ప్రధాని స్పష్టం చేశారు.
నూతన నిబంధనల ప్రకారం, ఆస్ట్రేలియాలో కార్యకలాపాలు సాగించే ఏఐ కంపెనీలకు ఆరు కీలకమైన చట్టబద్ధ బాధ్యతలను ప్రభుత్వం తప్పనిసరి చేసింది. తమ ఏఐ మోడళ్లు నిర్దేశిత హద్దులు దాటినా , ఏదైనా సైబర్ భద్రతా ఉల్లంఘన జరిగినా ఆ విషయాన్ని తక్షణమే ప్రభుత్వానికి రిపోర్ట్ చేయడం తప్పనిసరి చేశారు. అలాగే ప్రభుత్వం చేపట్టే స్వతంత్ర మూల్యాంకనానికి తమ మోడళ్లను అందుబాటులో ఉంచాలి. సాంకేతిక విప్లవం సమాజంపై ఆధిపత్యం చెలాయించకుండా, ప్రజాస్వామ్య వ్యవస్థలే సాంకేతికతను నియంత్రించేలా చట్టాలు ముందుండాలని ఆస్ట్రేలియా ప్రధాని పేర్కొన్నారు. ఇప్పటికే 16 ఏళ్ల లోపు పిల్లలపై సోషల్ మీడియా నిషేధం విధించి ప్రపంచ దృష్టిని ఆకర్షించిన ఆస్ట్రేలియా, ఇప్పుడు ఏఐ నియంత్రణలోనూ ప్రపంచానికే మార్గదర్శకంగా నిలుస్తుందని నిపుణులు విశ్లేషిస్తున్నారు.
