అటవీ అమరవీరుల త్యాగం సిరస్మరణీయం

నేటి దినపత్రిక సూర్య బ్యూరో రాజమహేంద్రవరం

 విధి నిర్వహణలో ప్రాణాలర్పించిన అటవీ శాఖ అమరవీరుల త్యాగాలు చిరస్మరణీయమని ఆంధ్రప్రదేశ్ రాష్ట్ర అటవీ అకాడమీ డైరెక్టర్ బి. విజయ కుమార్ అన్నారు. 

రాష్ట్ర అమరవీరుల దినోత్సవం సందర్భంగా రాజమహేంద్రవరం లోని ఆంధ్రప్రదేశ్ రాష్ట్ర అటవీ అకాడమీలో మంగళవారం అమరవీరులకు ఘనంగా నివాళులర్పించారు. డైరెక్టర్ ఆధ్వర్యంలో అకాడమీ అధ్యాపకులు, సిబ్బంది, శిక్షణ అధికారులు అమరవీరుల స్మారక స్తూపం వద్ద పుష్పాంజలి ఘటించారు.

ఈ సందర్భంగా ఆయన మాట్లాడుతూ, ప్రతి ఏటా నవంబర్ 10న రాష్ట్ర అమరవీరుల దినోత్సవాన్ని నిర్వహిస్తున్నారు. ఆంధ్రప్రదేశ్‌కు చెందిన ఐఎఫ్ఎస్ అధికారి పి. శ్రీనివాస్ 1991 నవంబర్ 10న కర్ణాటకలో విధి నిర్వహణలో ఉండగా హత్యకు గురయ్యారనీ , ఆయన స్మృతికి గుర్తుగా ఈ రోజున అమరవీరులకు నివాళులర్పిస్తున్నారు. రాష్ట్రంలో ఇప్పటివరకు 23 మంది అటవీ శాఖ అధికారులు, సిబ్బంది విధి నిర్వహణలో ప్రాణాలు కోల్పోయారు. అడవులు, వన్యప్రాణులు, పర్యావరణ పరిరక్షణ కోసం వారు చేసిన త్యాగాలు ఎప్పటికీ మరువలేనివని పేర్కొన్నారు.అమరవీరుల స్ఫూర్తితో అటవీ సంపద, వన్యప్రాణుల సంరక్షణకు అంకితభావంతో పనిచేయాలని డైరెక్టర్ సూచించారు. క్షేత్రస్థాయిలో విధులు నిర్వహించే సిబ్బంది భద్రత, వృత్తి నైపుణ్యం, అప్రమత్తతకు ప్రాధాన్యమివ్వాలని తెలిపారు. శిక్షణ పొందుతున్న అధికారులు అమరవీరుల ఆదర్శాలను స్ఫూర్తిగా తీసుకొని విధులు నిర్వర్తించాలని ఆకాంక్షించారు. కార్యక్రమంలో అకాడమీ అధ్యాపకులు, సిబ్బంది, ట్రైనీ అధికారులు పాల్గొన్నారు.