రోజూ బ్రష్ చేస్తున్నా నోటి నుంచి దుర్వాసన వస్తోందా.. నాలుక విషయంలో ఈ తప్పు అస్సలు చేయకండి!
సూర్య ఆరోగ్య డెస్క్: ప్రతిరోజూ క్రమం తప్పకుండా రెండుసార్లు పళ్లు తోముకుంటున్నప్పటికీ, కొందరిలో నోటి నుంచి దుర్వాసన వచ్చే సమస్య వేధిస్తుంటుంది. పళ్లు, నోరు శుభ్రంగా ఉన్నప్పటికీ ఈ సమస్య ఎందుకు వస్తుందని చాలామంది ఆశ్చర్యపోతుంటారు. ముఖ్యంగా నలుగురిలో మాట్లాడేటప్పుడు ఈ దుర్వాసన కారణంగా ఇబ్బంది పడాల్సి వస్తుంది. అయితే కేవలం పళ్ల పరిశుభ్రత లోపించడం మాత్రమే కాకుండా, అనేక ఇతర కారణాల వల్ల కూడా నోటి దుర్వాసన వస్తుందని ఆరోగ్య నిపుణులు స్పష్టం చేస్తున్నారు.
నోటి దుర్వాసనకు ప్రధాన కారణాలలో ఒకటి నాలుకను సరిగ్గా శుభ్రం చేయకపోవడం. చాలామంది కేవలం పళ్లపైనే శ్రద్ధ పెట్టి నాలుకను విస్మరిస్తుంటారు. నాలుక ఉపరితలంపై ఉండే చిన్న చిన్న గుంటలు లేదా మడతల్లో ఆహార అవశేషాలు, బ్యాక్టీరియా పేరుకుపోయి దుర్వాసనకు దారితీస్తాయి. అందుకే ప్రతిరోజూ బ్రష్ చేసిన తర్వాత టంగ్ క్లీనర్‌తో నాలుకను సున్నితంగా శుభ్రం చేసుకోవడం చాలా ముఖ్యం. అలాగే శరీరంలో తగినంత నీరు లేకపోవడం వల్ల నోరు పొడిబారి లాలాజల ఉత్పత్తి తగ్గిపోతుంది, ఇది కూడా దుర్వాసనకు మరో ముఖ్య కారణం.
పళ్ల మధ్యలో చిక్కుకుపోయిన ఆహార పదార్థాలను తొలగించకపోవడం, పొగతాగడం, పొగాకు ఉత్పత్తులను ఉపయోగించడం వంటి అలవాట్లు నోటి దుర్వాసనను మరింత పెంచుతాయి. కొన్ని సందర్భాల్లో పళ్లు, చిగుళ్లు పూర్తిగా ఆరోగ్యంగా ఉన్నప్పటికీ సైనస్ ఇన్ఫెక్షన్, ముక్కు లేదా గొంతుకు సంబంధించిన సమస్యలు మరియు జీర్ణవ్యవస్థలో తేడాల వల్ల కూడా ఈ సమస్య తలెత్తవచ్చు. చిగుళ్ల నుంచి రక్తం కారడం లేదా పళ్లపై గార పేరుకుపోవడం వంటి లక్షణాలు కనిపిస్తే వెంటనే దంతవైద్యుడిని సంప్రదించి తగిన జాగ్రత్తలు తీసుకోవాలి.
ఈ సమస్య నుంచి విముక్తి పొందడానికి ప్రతిరోజూ ఉదయం, రాత్రి సమయాల్లో ఫ్లోరైడ్ టూత్‌పేస్ట్‌తో పళ్లు తోముకోవడంతో పాటు, ఫ్లాస్ ఉపయోగించి పళ్ల మధ్య భాగాలను శుభ్రం చేసుకోవాలి. రోజంతా తగినన్ని నీరు తాగుతూ శరీరాన్ని హైడ్రేటెడ్‌గా ఉంచుకోవడం ద్వారా లాలాజల ఉత్పత్తి సక్రమంగా జరుగుతుంది. ఒకవేళ సరైన మౌత్ హైజిని పాటిస్తున్నప్పటికీ నోటి దుర్వాసన తగ్గకపోతే, మౌత్‌వాష్‌లతో తాత్కాలిక ఉపశమనం పొందకుండా వైద్యులను సంప్రదించి అసలు కారణాన్ని గుర్తించి చికిత్స తీసుకోవడం ఎల్లప్పుడూ శ్రేయస్కరం.
Also Read: టీమిండియాకు గుడ్ న్యూస్.. న్యూజిలాండ్ టూర్‌కు స్టార్ వికెట్ కీపర్ రిషభ్ పంత్ రీఎంట్రీ!
