స్మోగ్ ముసుగులో ఉత్తర భారతం: నాసా శాటిలైట్ చిత్రాలు
సూర్య జాతీయ డెస్క్: దీపావళి వేడుకల అనంతరం దేశ రాజధాని ప్రాంతం సహా ఉత్తర భారతదేశం మొత్తం ఒక ప్రమాదకరమైన 'స్మోగ్ ట్రాప్' (విషపూరిత పొగమంచు వలయం)లో చిక్కుకుపోయింది. పటాకుల మోత, పంట వ్యర్థాల దహనం, వాహనాల కాలుష్యంతో ఏర్పడిన దట్టమైన బూడిద రంగు విష వలయం ఉత్తర భారత భూభాగాన్ని కమ్మేయగా, అంతరిక్షం నుంచి సైతం ఈ విపత్తు స్పష్టంగా కనిపించడం తీవ్ర దిగ్భ్రాంతిని కలిగిస్తోంది. అమెరికా అంతరిక్ష పరిశోధనా సంస్థ నాసా కు చెందిన వరల్డ్‌వ్యూ/మోడిస్ ఉపగ్రహాలు తీసిన తాజా చిత్రాలు ఈ భయానక వాయు సంక్షోభ తీవ్రతను కళ్లకు కట్టాయి. ఉపగ్రహ దృశ్యాల్లో ఉత్తర భారత మైదానాలు, ముఖ్యంగా ఇండో-గంగా పరివాహక ప్రాంతమంతా ఒక మందపాటి బూడిద తెర వెనుక పూర్తిగా కనుమరుగైపోయినట్లు నమోదైంది.
నాసా విడుదల చేసిన చిత్రాల ప్రకారం.. ఢిల్లీ-ఎన్‌సీఆర్, ఉత్తరప్రదేశ్, పంజాబ్, హర్యానా రాష్ట్రాలు ఈ విషపు పొగమంచు తీవ్రతకు అత్యధికంగా గురయ్యాయి. ఈ బూడిద రంగు పొగమంచు పొరలు ఉత్తరాఖండ్, హిమాచల్ ప్రదేశ్, జమ్మూ కాశ్మీర్ వంటి హిమాలయ పర్వత శ్రేణుల వరకు విస్తరించి ఉన్నాయి. హిమంతో కప్పబడిన తెల్లని పర్వతాలు, పక్కనే ఉన్న మైదాన ప్రాంతాల్లోని ముదురు బూడిద రంగు స్మోగ్ మధ్య ఉన్న వ్యత్యాసం కాలుష్య వ్యాప్తిని స్పష్టంగా చూపుతోంది. సరిహద్దులకు ఆవల ఉన్న పాకిస్తాన్‌లోని పంజాబ్ ప్రావిన్స్ నుంచి మొదలై తూర్పు భారతదేశం వైపుకు ఈ పొగమంచు మేఘాలు విస్తరించాయి. పశ్చిమ దిక్కున ఉన్న రాజస్థాన్, గుజరాత్ మరియు ఈశాన్య రాష్ట్రాలు మాత్రమే ఈ చిత్రాల్లో సాపేక్షంగా స్పష్టంగా కనిపించాయి.
పండుగ వేళ సుప్రీంకోర్టు ఆదేశాలను ఉల్లంఘించి విచ్చలవిడిగా కాల్చిన బాణసంచా పొగకు తోడు, వాయవ్య వ్యవసాయ క్షేత్రాల్లో వేల సంఖ్యలో పంట వ్యర్థాలను తగులబెట్టడం (స్టబుల్ బర్నింగ్) ఈ సంక్షోభాన్ని పరాకాష్టకు చేర్చింది. నాసా ఉపగ్రహ చిత్రాల్లో వ్యవసాయ వ్యర్థాల దహనానికి సంబంధించిన వందలాది రెడ్ ఫైర్ హాట్‌స్పాట్లు రికార్డయ్యాయి. శీతాకాలం చల్లని ఉష్ణోగ్రతలు, నిశ్చలమైన గాలులు మరియు అట్మాస్ఫియరిక్ బౌండరీ లేయర్ నేలమట్టానికి దిగిరావడంతో ఈ ఉద్గారాలు గాల్లోకి వెళ్లకుండా భూమికి దగ్గరగానే పేరుకుపోయిగా రూపాంతరం చెందాయి.
ఈ విషవాయువుల కారణంగా లక్షలాది మంది ప్రజలు, ముఖ్యంగా పిల్లలు, వృద్ధులు తీవ్రమైన ఊపిరితిత్తుల ఇన్ఫెక్షన్లు, కళ్ల మంటలు, ఆస్తమా వంటి ప్రాణాంతక సమస్యలతో ఆసుపత్రుల పాలవుతున్నారు. కాలుష్యం కేవలం ఢిల్లీ నగరానికే పరిమితం కాకుండా మొత్తం ఉత్తర భారత ప్రాంతాన్ని గ్యాస్ చాంబర్‌లా మార్చేసిందని ఈ శాటిలైట్ రికార్డులు చాటిచెబుతున్నాయి. ప్రభుత్వాలు తాత్కాలిక ఆంక్షలతో సరిపెట్టకుండా, ఈ ప్రాంతీయ విపత్తును జాతీయ ఎమర్జెన్సీగా పరిగణించి కఠిన శాశ్వత విధానాలు అమలు చేయకపోతే ఏటా కోట్లాది మంది ఆయుష్షు హరించుకుపోవడం ఖాయమని పర్యావరణ వేత్తలు, వైద్య నిపుణులు తీవ్ర హెచ్చరికలు జారీ చేస్తున్నారు.
