national
ప్రజా సమస్యపై నిలదీసిన వ్యక్తినే కొట్టిన టీవీకే ఎమ్మెల్యే..
చెన్నై: తమిళనాడు అసెంబ్లీ డిప్యూటీ స్పీకర్, తమిళగ వెట్రి కజగం (టీవీకే) పార్టీ ఎమ్మెల్యే ఎం. రవిశంకర్ తీవ్ర వివాదంలో చిక్కుకున్నారు. తన నియోజకవర్గంలో ప్రజా సమస్యల పరిష్కారం కోసం వచ్చిన ఒక సామాన్య పౌరుడిపై ఆయన భౌతిక దాడికి దిగడం తమిళనాడు రాజకీయాల్లో తీవ్ర దుమారం రేపుతోంది.
తిరుచిరాపల్లి జిల్లా పరిధిలోని తురైయూర్ ప్రాంతంలో తాగునీటి ఎద్దడి, వీధుల్లో చెత్త నిలిచిపోవడం వంటి సమస్యలపై కార్తీక కుమార్ అనే స్థానిక పౌరుడు ఎమ్మెల్యే రవిశంకర్‌ను కలిసి ఫిర్యాదు చేసేందుకు ప్రయత్నించారు. అయితే, ఆ సమస్యలను వినకుండానే ఎమ్మెల్యే రవిశంకర్ సదరు వ్యక్తిపై తీవ్ర ఆగ్రహంతో చేయి చేసుకుని తోసివేశారు. ఈ ఘటనకు సంబంధించిన వీడియో సోషల్ మీడియాలో విపరీతంగా వైరల్ కావడంతో ప్రతిపక్షాల నుంచి, పౌర సమాజం నుంచి విమర్శలు వెల్లువెత్తుతున్నాయి.
ఇటీవలే తమిళగ వెట్రి కజగం నేతలపై వరుసగా ఆరోపణలు రావడం, గత ఆరు నెలల కాలంలోనే పలువురు ప్రతినిధులు పలు వివాదాల్లో చిక్కుకోవడం పార్టీకి తీవ్ర ఇబ్బందికరంగా మారింది. ఈ నేపథ్యంలో సొంత పార్టీ ఎమ్మెల్యే మరియు డిప్యూటీ స్పీకర్ అయిన రవిశంకర్ ప్రవర్తనపై ముఖ్యమంత్రి సి. జోసెఫ్ విజయ్ ఎలాంటి చర్యలు తీసుకుంటారనే దానిపై రాజకీయ వర్గాల్లో తీవ్ర ఆసక్తి నెలకొంది.
