andhrapradesh
జగన్ కు షాక్ ..పార్టీకి ముఖ్య నేత గుడ్ బై
విజయవాడ: ఆంధ్రప్రదేశ్ రాజకీయాల్లో మరో కీలక పరిణామం చోటుచేసుకుంది. వైఎస్సార్ కాంగ్రెస్ పార్టీ సీనియర్ నేత, ప్రముఖ శాస్త్రవేత్త అన్నపరెడ్డి విజయభాస్కర్ రెడ్డి వైఎస్‌ఆర్‌సీపీ ప్రాథమిక సభ్యత్వంతో పాటు తన పదవులకు రాజీనామా చేశారు.
అమెరికాలో ఫార్మసీ, క్లినికల్ రీసెర్చ్ రంగాల్లో సైంటిస్టుగా ఉన్నత స్థాయిలో స్థిరపడి, కేవలం ప్రజా సేవ చేయాలనే తపనతో మాతృభూమికి తిరిగి వచ్చిన విజయభాస్కర్ రెడ్డి ఈ సందర్భంగా వైఎస్‌ఆర్‌సీపీ నాయకత్వంపై తీవ్రస్థాయిలో విమర్శలు గుప్పించారు. వైఎస్ రాజశేఖర్ రెడ్డి మరణాంతరం జగన్ కేవలం 'వైఎస్సార్ కొడుకు' అనే బ్రాండ్‌ను మాత్రమే వాడుకున్నారని, నాయకత్వ లక్షణాలు మరియు రాజకీయ పరిపక్వత చూపించడంలో విఫలమయ్యారని ఆరోపించారు. తాడేపల్లి నివాసం చుట్టూ అలుముకున్న కోటరీ వ్యవస్థ వల్ల పార్టీకి తీరని నష్టం జరిగిందని, శ్రేణులకు నాయకుడు అందుబాటులో లేని పరిస్థితి దాపురించిందన్నారు.
సజ్జల రామకృష్ణారెడ్డి, ఆయన కుమారుడు సజ్జల భార్గవ్ రెడ్డిల వైఖరి వల్ల కష్టపడే కార్యకర్తలు నష్టపోయారని, పార్టీ కోసం కష్టపడి పనిచేసిన శ్రేణులను, వాలంటీర్ వ్యవస్థను నట్టేట ముంచి జగన్ తీవ్ర ద్రోహానికి పాల్పడ్డారని మండిపడ్డారు. వైఎస్‌ఆర్‌సీపీలో స్పష్టమైన వ్యవస్థాగత సభ్యత్వాలు ఉండవని, సంతకాలు లేని లెటర్ ప్యాడ్లపై పదవులు కేటాయిస్తారని ఎద్దేవా చేసిన ఆయన, సొంత మీడియాను కేవలం వ్యక్తిగత భజనకు మాత్రమే పరిమితం చేసుకున్నారని విమర్శించారు.
