పార లీగల్ వాలంటీర్ల పాత్ర కీలకం

నేటి దినపత్రిక సూర్య బ్యూరో రాజమహేంద్రవరంసమాజంలో చట్టాలు, హక్కులపై సరైన అవగాహన లేక నిస్సహాయ స్థితిలో ఉన్న వివిధ వర్గాల ప్రజలకు న్యాయ సహాయాన్ని చేరవేయడంలో పారా లీగల్ వాలంటీర్ల పాత్ర అత్యంత కీలకమైనదని జిల్లా ప్రధాన న్యాయమూర్తి జూనేద్ అహ్మద్ మౌలానా పేర్కొన్నారు.

మంగళవారం రాజమహేంద్రవరం లోని జిల్లా కోర్టు ఆవరణలో ఉన్న జిల్లా న్యాయ సేవాధికార సంస్థ సమావేశ మందిరంలో ఉమ్మడి తూర్పుగోదావరి జిల్లా పరిధిలోని పారా లీగల్ వాలంటీర్లకు జిల్లా న్యాయ సేవాధికార సంస్థ ఆధ్వర్యంలో నిర్వహించిన రెండు రోజుల శిక్షణ కార్యక్రమానికి ఆయన ముఖ్య అతిథిగా హాజరయ్యారు. ఈ సందర్భంగా ఆయన మాట్లాడుతూ ప్రజలకు, న్యాయ సేవాధికార సంస్థకు మధ్య పారా లీగల్ వాలంటీర్లు విశ్వసనీయమైన వారధిగా నిలవాలని సూచించారు. క్రమశిక్షణ, నీతి, నిజాయితీ, నిస్వార్థ సేవాభావంతో తమకు అప్పగించిన బాధ్యతలను సమర్థవంతంగా నిర్వహించాలని కోరారు.

ఈ కార్యక్రమంలో జిల్లా న్యాయ సేవాధికార సంస్థ కార్యదర్శి, సీనియర్ సివిల్ జడ్జి వై. శ్రీలక్ష్మి మాట్లాడుతూ పారా లీగల్ వాలంటీర్లు తమ విధులను అత్యంత బాధ్యతాయుతంగా, నిజాయితీతో నిర్వర్తించాలని సూచించారు. న్యాయ సేవాధికార సంస్థ ద్వారా వాలంటీర్లకు కల్పించిన గుర్తింపు, అధికారాలను ఎట్టి పరిస్థితుల్లోనూ వ్యక్తిగత ప్రయోజనాల కోసం లేదా అనధికారిక కార్యకలాపాల కోసం దుర్వినియోగం చేయకూడదని స్పష్టం చేశారు. సంస్థ నిర్దేశించిన నిబంధనలు, విధివిధానాలకు లోబడి మాత్రమే బాధ్యతలు నిర్వహించాలని సూచించారు.సీనియర్ న్యాయవాది డాక్టర్ పి. త్రినాథరావు మాట్లాడుతూ సమాజంలోని అనేక మంది ప్రజలకు ఉచిత న్యాయ సహాయం పొందే అవకాశాలు, ప్రాథమిక హక్కులపై సరైన అవగాహన లేదన్నారు. అటువంటి వారికి పారా లీగల్ వాలంటీర్లు అండగా నిలుస్తూ, వారి సమస్యలను గుర్తించి, తగిన న్యాయ సహాయం అందేలా కృషి చేయాలని సూచించారు. సీనియర్ న్యాయవాది డాక్టర్ పి. త్రినాథరావు తెలుగులో రచించిన “అటవీ హక్కుల గుర్తింపు చట్టం–2006: తరచూ అడిగే ప్రశ్నలు – వివరణ” అనే పుస్తకాన్ని జిల్లా ప్రధాన న్యాయమూర్తి జూనేద్ అహ్మద్ మౌలానా ఆవిష్కరించారు.అనంతరం నిర్వహించిన శిక్షణ కార్యక్రమంలో పారా లీగల్ వాలంటీర్లు నిర్వర్తించాల్సిన విధులు, బాధ్యతలు, విధివిధానాలు, వారి అధికార పరిధి, ప్రజలకు న్యాయ సహాయం అందించే విధానం తదితర అంశాలపై సీనియర్ న్యాయవాది డాక్టర్ పి. త్రినాథరావు సమగ్రంగా వివరించారు. కార్యక్రమంలో ఉమ్మడి తూర్పుగోదావరి జిల్లా పరిధిలోని వివిధ ప్రాంతాల నుంచి హాజరైన పారా లీగల్ వాలంటీర్లు పాల్గొన్నారు