88 రోజులుగా పార్లమెంట్ ప్రొరోగ్ కాలేదు: కేంద్రంపై కాంగ్రెస్ ఫైర్

సూర్య జాతీయ డెస్క్: పార్లమెంట్ వర్షాకాల సమావేశాలు నిరవధికంగా వాయిదా (Sine Die) పడి 88 రోజులు గడిచినా రాష్ట్రపతి ద్వారా ఇంకా అధికారికంగా సత్రావసానం (Prorogation) చేయకపోవడంపై రాజకీయ దుమారం రేగింది. కేంద్రంలోని నరేంద్ర మోదీ ప్రభుత్వం కావాలనే సమావేశాలను లాంఛనంగా ముగించకుండా ఉంచిందని కాంగ్రెస్ పార్టీ తీవ్రస్థాయిలో మండిపడింది. కేంద్ర హోం మంత్రి అమిత్ షా లోక్‌సభలో వివాదాస్పద నియోజకవర్గాల పునర్విభజన (డీలిమిటేషన్) బిల్లులను నెగ్గించుకోవడానికి అవసరమైన మూడింట రెండొంతుల (2/3rd) ప్రత్యేక మెజారిటీని కూడగట్టుకునే సమయం కోసమే ఈ కుట్ర పన్నారని కాంగ్రెస్ ప్రధాన కార్యదర్శి జైరాం రమేష్ ఆరోపించారు.

సాధారణంగా పార్లమెంట్ సమావేశాలు నిరవధికంగా వాయిదా పడిన 2 నుంచి 4 రోజుల్లోనే రాష్ట్రపతి ప్రోరోగ్ ఉత్తర్వులు జారీ చేయడం సాంప్రదాయం కాగా, ఈసారి ఏకంగా 88 రోజుల పాటు ఎలాంటి నిర్ణయం తీసుకోకపోవడం పార్లమెంటరీ చరిత్రలోనే సరికొత్త రికార్డుగా నిలిచింది. గతంలో 2008లో నెలకొన్న ప్రత్యేక పరిస్థితుల్లో అన్ని పార్టీల ఏకాభిప్రాయంతో 87 రోజుల పాటు సభ ప్రొరోగ్ కాలేదని, అయితే ప్రస్తుత ప్రభుత్వం డీలిమిటేషన్ బిల్లులను బలవంతంగా ఆమోదింపజేసేందుకే తమదైన 'బుల్డోజర్ వ్యూహాలను' అమలు చేస్తోందని విపక్షాలు ధ్వజమెత్తాయి. కొత్త సమావేశాలను పిలవాలంటే కనీసం 14 రోజుల గడువు అవసరమవుతుందని, అదే పాత సెషన్ కొనసాగింపుగా ప్రత్యేక సమావేశాన్ని నిర్వహిస్తే కేవలం 2 రోజుల స్వల్ప వ్యవధి నోటీసుతోనే సభను తిరిగి ప్రారంభించే వెసులుబాటు ఉంటుందనే ప్రభుత్వం ఇలా వ్యవహరిస్తోందని కాంగ్రెస్ అనుమానం వ్యక్తం చేసింది.

ఇప్పటికే డీలిమిటేషన్ బిల్లును పార్లమెంట్‌లో ప్రవేశపెట్టే ముందే అన్ని అంశాలపై విస్తృతంగా చర్చించేందుకు వెంటనే అఖిలపక్ష సమావేశం ఏర్పాటు చేయాలని కాంగ్రెస్ అధ్యక్షుడు మల్లికార్జున ఖర్గే ప్రధానమంత్రికి నాలుగు సార్లు లేఖలు రాసినా కేంద్రం నుంచి ఎలాంటి స్పందన రాలేదని పార్టీ వర్గాలు గుర్తుచేశాయి. గతంలో సభలో ప్రభుత్వం చేసిన ప్రయత్నాలను ప్రతిపక్షాల ఐక్యత అడ్డుకుందని, మళ్లీ ప్రభుత్వం బుల్డోజర్ వ్యూహాలతో ప్రజాస్వామ్య ప్రక్రియలను విస్మరించాలని చూస్తే ఉమ్మడిగా తిప్పికొడతామని ప్రతిపక్ష కూటమి హెచ్చరించింది. రాజ్యాంగంలో ప్రొరోగ్ చేయడానికి నిర్దిష్ట కాలపరిమితి లేనప్పటికీ, నియమ నిబంధనలను అడ్డుపెట్టుకుని సంఖ్యాబలాన్ని మార్చే కుయుక్తులకు తెరలేపడం సమర్థనీయం కాదని విశ్లేషకులు భావిస్తున్నారు.